عراق میں یونیسکو کے دفتر کے شعبۂ تعلیم کے سربراہ، تونی کار ہونغ تام نے اعلان کیا ہے کہ یونیسکو عراق میں تعلیم، ثقافت اور ثقافتی ورثے کے تحفظ کے فروغ کے لیے اپنی سرگرمیاں جاری رکھے گا، اور اس سلسلے میں پیشہ ورانہ تعلیم و تربیت کے نظام (TVET) کے تیسرے مرحلے کا آغاز کیا جا رہا ہے

ہونع نے کہا کہ یونیسکو نے عراق کو TVET نظام کے پہلے اور دوسرے مرحلے کے نفاذ میں مدد فراہم کی، اور اب ہم تیسرے مرحلے میں داخل ہو چکے ہیں، جس کا مقصد تعلیمی معیار کو بہتر بنانا اور شراکت داروں کے ساتھ تعاون کو مشارکتی انداز میں آگے بڑھانا ہے

انہوں نے مزید بتایا کہ اس تعاون میں تین وزارتیں ــ وزارت تعلیم، وزارتِ اعلیٰ تعلیم اور وزارتِ محنت و امورِ اجتماعی ــ شامل ہیں تاکہ تکنیکی اور پیشہ ورانہ مدارس کے نصاب کو بہتر بنایا جا سکے۔ یہ شراکت حکومتِ عراق کے ساتھ مضبوط تعاون اور ملکی ضروریات کے تعین کی عکاسی کرتی ہے

ہونغ تام نے واضح کیا کہ یونیسکو عراقی لیبر مارکیٹ کا جائزہ لینے کے عمل میں ہے تاکہ ترقی کا آغاز درست سمت میں کیا جا سکے۔ اس ضمن میں خاص توجہ سبز معیشت اور ڈیجیٹل معیشت پر دی جا رہی ہے، کیونکہ یہی TVET-3 کے بنیادی ستون ہیں۔ ضروریات کے تعین کے بعد یہ طے کیا جائے گا کہ کن شعبوں کی فوری ترقی درکار ہے

انہوں نے مزید کہا کہ یونیسکو سائنس، ثقافت اور تعلیم کے کئی شعبوں کی ترقی کے لیے پرعزم ہے۔ ہم ان منصوبوں پر بھی کام کر رہے ہیں جو سبز معیشت، ڈیجیٹلائزیشن اور ثقافتی ورثے کے تحفظ و ترقی سے متعلق ہیں۔ یہ تمام اقدامات موسمیاتی تبدیلیوں کا مقابلہ کرنے اور پائیدار ترقی کو فروغ دینے کے تناظر میں کیے جا رہے ہیں