چہلمِ امام حسین علیہ السلام کے موقع پر دنیا بھر سے کربلا آنے والے لاکھوں زائرین کے استقبال کے لیے حرم امام حسین علیہ السلام کی جانب سے ایک جامع اور وسیع پیمانے پر خدمتی و انجینئرنگ منصوبے پر عمل درآمد شروع کر دیا گیا ہے۔ اس منصوبے کا مقصد زائرین کو شدید گرمی کے موسم میں آرام دہ، محفوظ اور باعزت ماحول فراہم کرنا ہے

اس منصوبے پر عمل درآمد شعبۂ منصوبہ جاتِ انجینئرنگ کے ذریعے کیا جا رہا ہے

شعبے کے سربراہ انجینئر حسین رضا مہدی کے مطابق زائرین کو فراہم کی جانے والی سہولیات میں حرم مطہر اور صحن شریف کے اندرونی حصوں میں ایئرکنڈیشننگ کا مکمل بندوبست، برقی نظام کی توسیع اور جدید کاری، نیز عوامی خدمات سے متعلق بنیادی ڈھانچے کی دیکھ بھال شامل ہے۔

انہوں نے بتایا کہ حرم کے مختلف حصوں میں مجموعی طور پر 9000 ٹن کولنگ کی گنجائش فراہم کی گئی ہے، جب کہ صحن کے داخلی دروازوں پر 100 فیصد تازہ ہوا فراہم کرنے والے ایئر پُشر نصب کیے گئے ہیں تاکہ ہوا کی گردش بہتر بنائی جا سکے اور درجہ حرارت کو 24 سے 26 ڈگری سینٹی گریڈ تک رکھا جا سکے

انجینئر مہدی کے مطابق شہر کے بیرونی علاقوں میں بھی مکمل انجینئرنگ کوریج دی گئی ہے۔ 135,000 مربع میٹر سے زائد رقبے پر جدید اور پائیدار کولنگ سسٹمز نصب کیے گئے ہیں جو شارع السدة، شارع الشہداء، باب السلام، شارع السیاحة، مستشفى الشہداء اور بابِ قبلہ امام حسینؑ جیسے اہم راستوں پر محیط ہیں۔ ان سسٹمز میں ایسے مخصوص مواد کا استعمال کیا گیا ہے جو سخت موسمی حالات، شدید گرمی اور گرد و غبار کا مؤثر مقابلہ کر سکتے ہیں، جب کہ مقام کی خوبصورتی اور اسلامی شناخت کو بھی برقرار رکھا گیا ہے

ان تمام اقدامات کو مؤثر بنانے کے لیے مجموعی طور پر 3700 صنعتی ایئر کولرز نصب کیے گئے ہیں، جن میں سے 400 بالکل نئے کولرز ہیں۔ یہ سسٹمز تقریباً 250,000 مربع میٹر رقبے اور صحن شریف کی طرف جانے والے راستوں پر نصب کیے گئے ہیں۔ اس کے علاوہ 125 اضافی کولرز اور ایئر ڈسپلیسمنٹ فینز بھی مختلف اہم مقامات پر نصب کیے گئے ہیں

حرم کی جانب سے معاون ہوٹلوں، موبائل کلینکس، گاڑیوں، اور صحن العقيلة، امام حسینؑ، اور امام علی اکبرؑ کی ہالز کو بھی بجلی کی مسلسل فراہمی یقینی بنائی جا رہی ہے تاکہ زائرین اور عملے کو کسی قسم کی دشواری کا سامنا نہ ہو

انجینئر حسین رضا مہدی نے اپنے بیان کے اختتام پر کہا کہ یہ تمام کوششیں حرم کی اس بصیرت کا مظہر ہیں جس کے تحت زائرینِ امام حسینؑ کو ہر سال نہ صرف مذہبی بلکہ انسانی ہمدردی کے جذبے کے تحت بہترین سہولیات فراہم کی جاتی ہیں۔ ان کا کہنا تھا کہ یہ منصوبہ حسینی خدمت کے اس جذبے کی عملی تجسیم ہے جو ہر سال نئے عزم کے ساتھ دہرایا جاتا ہے۔