دہلی کی سب سے بڑی جامع مسجد میں رمضان المبارک کے بابرکت مہینے کے دوران اتحاد اور بھائی چارے کا عملی مظاہرہ دیکھنے کو ملتا ہے

رمضان کے مہینے میں یہاں روزانہ ہزاروں لوگ افطار کے لیے آتے ہیں، جن میں مقامی افراد، مسافر اور سیاح بھی شامل ہوتے ہیں۔ مسجد کے صحن میں بڑی تعداد میں چٹائیاں بچھائی جاتی ہیں، جہاں لوگ قطار میں بیٹھ کر افطار کرتے ہیں۔ مسجد انتظامیہ روزہ داروں کے لیے کھجور، پانی، سموسے، پکوڑے، پھل اور دیگر اشیائے خور و نوش کا اہتمام کرتی ہے، جب کہ کئی افراد اپنی طرف سے بھی افطار تقسیم کرتے ہیں، جس میں کھجور، فروٹ چاٹ، جلیبی، بریانی اور دیگر کھانے شامل ہوتے ہیں۔

کچھ لوگ اپنی استطاعت کے مطابق نقدی یا راشن دے کر بھی اس کارِ خیر میں حصہ لیتے ہیں۔ جامع مسجد کی انتظامیہ اور رضاکار افطار کے انتظامات سنبھالتے ہیں، جب کہ نظم و ضبط برقرار رکھنے کے لیے کچھ افراد خدمت اور نگرانی کی ذمہ داری ادا کرتے ہیں۔

مسجد انتظامیہ کا کہنا ہے کہ کوئی بھی شخص یہاں آکر افطار کرسکتا ہے، خواہ اس کا تعلق کسی بھی مذہب یا طبقے سے ہو۔

بہت سے لوگ اپنے گھروں سے بھی کھانے کی اشیاء لا کر دوسروں میں تقسیم کرتے ہیں۔

جامع مسجد دہلی میں افطار کا یہ روحانی منظر ایک خوبصورت تجربہ ہوتا ہے، جہاں لوگ مل کر روزہ افطار کرتے ہیں اور بھائی چارے کی فضا قائم رہتی ہے۔