عراقی حکومت نے شدید الفاظ میں مرجعیت کی توہین کی مذمت کرتے ہوئے کہا ہے کہ مرجعیت کو عراقی عوام، عرب و اسلامی دنیا اور عالمی برادری میں بہت عزت و احترام حاصل ہے

حکومتی ترجمان، باسم العوادی، نے بیان میں کہا کہ اسرائیل کی نسل کشی اور انسانیت کے خلاف جرائم کے بعد، اس کے متعصب میڈیا نے مرجعیت کی توہین کی کوشش کی، جو ایک سستی حرکت ہے اور اس کا مقصد مرجعیت کی اعلیٰ تصویر کو نقصان پہنچانا ہے۔

باسم العوادی نے مزید کہا کہ "عراقی حکومت شدید ترین الفاظ میں مرجعیت کی حیثیت کو نشانہ بنانے کی کوششوں کی مذمت کرتی ہے، جسے عراقی عوام، عرب و اسلامی دنیا اور عالمی برادری میں عزت و احترام حاصل ہے۔ حکومت ان نسل پرستانہ فکری پس منظر پر مبنی ان کوششوں کی سنگینی سے خبردار کرتی ہے، جو مقدساتِ عوام کے ساتھ تمسخر پر مبنی ہیں۔ یہ اقدامات جارحیت کو بڑھاوا دیتے ہیں اور عالمی امن و سلامتی کے لیے حقیقی خطرہ بن سکتے ہیں۔

باسم العوادی نے مزید کہا: "اسرائیلی ریاست نے ایک بار پھر ثابت کیا ہے کہ یہ صرف ایک مجرمانہ گروہ ہے جو بحران پیدا کرنے، جنگ اور جارحیت کو بڑھاوا دینے پر قائم ہے۔ اس کے نتیجے میں اس کی عالمی سطح پر تنہائی میں روز بروز اضافہ ہو رہا ہے۔ دنیا بھر میں عوام اور بین الاقوامی برادری کی جانب سے اس کے رویے کی مذمت اس جارحانہ روش کی تصدیق کرتی ہے۔

باسم العوادی نے کہا: "ان حالات کے پیش نظر، ہم اقوام متحدہ کے سیکرٹری جنرل اور تمام عالمی اور بین الاقوامی فورمز سے اپیل کرتے ہیں کہ وہ دنیا بھر کے مسلمانوں کے جذبات کو ٹھیس پہنچانے والی تمام کوششوں کی مذمت کریں، اور ان عالمی شخصیات کو نشانہ بنانے کی کوششوں کی مخالفت کریں جنہیں عالمی سطح پر اثر و رسوخ اور عزت حاصل ہے۔

باسم العوادی نے اپنے بیان کا اختتام کرتے ہوئے کہا: "عراق، حکومت اور عوام نے جنگ کو روکنے کے لیے ہر ممکن کوشش کی، لیکن اسرائیلی حکومت اور اس کی انتہا پسندانہ پالیسیوں کے ساتھ ساتھ بین الاقوامی برادری کی ناکامی نے صورتحال کو مزید بگاڑ دیا۔ آج اسرائیل اپنی واضح جرائم پر پردہ ڈالنے کے لیے توہین آمیز بیانات پھیلا رہا ہے، جسے ہم مکمل طور پر مسترد کرتے ہیں اور اسے ایک سنگین جارحیت سمجھتے ہیں۔ تاہم، یہ عراق کے اصولی اور ثابت قدم موقف کو کسی بھی طرح تبدیل نہیں کرے گا۔

ابو علی