امریکی ریاست مشی گن کے شہر ڈیئربورن میں اربعینِ امام حسینؑ کی مناسبت سے مرکزی جلوس نکالا گیا، جس میں 45 ہزار سے زائد عزاداروں اور زائرین نے شرکت کی

جلوس میں امریکا کی مختلف ریاستوں سے آئے ہوئے مرد، خواتین اور بچوں سمیت ہزاروں افراد شریک ہوئے۔ شرکاء نے حضرت امام حسینؑ اور شہدائے کربلا کو خراجِ عقیدت پیش کرتے ہوئے نوحہ خوانی اور ماتم کیا اور واقعۂ کربلا کی یاد تازہ کی

جلوس کے پُرامن انعقاد کے لیے سکیورٹی اور ٹریفک کے خصوصی انتظامات کیے گئے، جبکہ شرکاء کی سہولت کے پیشِ نظر متعدد سڑکیں عارضی طور پر بند رکھی گئیں۔ جلوس کے پورے راستے پر درجنوں مواکب اور رضاکارانہ خدمت کے مراکز قائم کیے گئے، جہاں مقامی رضاکاروں، ریسٹورنٹس کے مالکان اور فلاحی تنظیموں کے تعاون سے شرکاء میں پانی، کھانا اور مشروبات مفت تقسیم کیے گئے

منتظمین کے مطابق ڈیئربورن میں اربعینِ امام حسینؑ کے موقع پر منعقد ہونے والا یہ جلوس امریکی تاریخ میں اپنی نوعیت کا سب سے بڑا اجتماع بن چکا ہے۔ گزشتہ سال اس جلوس میں تقریباً 40 ہزار افراد نے شرکت کی تھی، جبکہ اس سال شرکاء کی تعداد بڑھ کر 45 ہزار سے تجاوز کر گئی، جو امریکا میں عرب اور مسلم کمیونٹی کے بڑھتے ہوئے مذہبی، ثقافتی اور سماجی کردار کی عکاسی کرتی ہے