یومِ عاشورا کے موقع پر آنے والے ماتمی جلوسوں اور محرم الحرام کی زیارات کے دوران زائرین کی خدمت اور ان کی سلامتی کو یقینی بنانے کے لیے حرمِ امام حسینؑ کے شعبۂ ترقی و سماجی تربیتِ نوجوانان نے، ابتدائی طبی امداد کمیشن کے ذریعے، ایک جامع امدادی منصوبے کا اعلان کیا ہے

منصوبے کے تحت حرمِ حسینیؑ کے اندر اور باہر مجموعی طور پر 43 امدادی مراکز قائم کیے جائیں گے، جہاں ابتدائی طبی امداد اور ہنگامی انخلا کی تربیت حاصل کرنے والے 550 اسکاؤٹ قائدین اور رضاکار خدمات سرانجام دیں گے۔ ان مراکز کا مقصد زائرین اور عزاداروں کو فوری طبی امداد فراہم کرنا اور ہنگامی حالات میں بروقت مدد کو یقینی بنانا ہے

شعبے کے سربراہ، استاد محمد محسن النصراوی نے بتایا کہ 9 محرم الحرام کے لیے مرتب کردہ منصوبے کے مطابق 21 امدادی مراکز قائم کیے جائیں گے، جن میں 9 مراکز حرمِ حسینیؑ کے اندر جبکہ 12 مراکز بیرونی علاقوں میں ہوں گے

یہ مراکز ہنگامی طبی امداد فراہم کرنے کے ساتھ ساتھ ضرورت پڑنے پر متاثرہ افراد کو قریبی طبی مراکز تک منتقل کرنے کی ذمہ داری بھی انجام دیں گے

انہوں نے مزید بتایا کہ 10 محرم الحرام کو مراسمِ عزائے رکضۃ طویریج کے دوران ہنگامی حالات سے نمٹنے کے لیے 22 امدادی مراکز فعال ہوں گے، جن میں 11 مراکز حرمِ مطہر کے اندر اور 11 مراکز باہر قائم کیے جائیں گے۔ یہ مراکز عزائی جلوسوں کے مرکزی راستوں پر تعینات ہوں گے تاکہ فوری ردِعمل اور بروقت امدادی کارروائی کو یقینی بنایا جا سکے

انہوں نے واضح کیا کہ اس منصوبے پر عمل درآمد کے لیے 550 اسکاؤٹ قائدین اور رضاکار حصہ لیں گے، جو ابتدائی طبی امداد اور ہنگامی انخلا کی مہارتوں میں تربیت یافتہ ہیں۔ یہ اقدام زائرین کے لیے محفوظ ماحول اور جامع انسانی خدمات کی فراہمی کے سلسلے میں جاری کوششوں کا حصہ ہے، تاکہ عاشورائے امام حسینؑ کے مراسم بہترین انداز میں انجام دیے جا سکیں