حرمِ امام حسینؑ کے دارالقرآن الکریم کے زیرِ اہتمام بین الاقوامی قرآنی ہفتے کی سرگرمیوں کا باقاعدہ آغاز ہو گیا، جس میں 30 عربی و اسلامی ممالک کے نمائندوں نے شرکت کی

اسی موقع پر صحنِ مطہر حسینی میں کربلا انٹرنیشنل قرآن کریم تلاوت و حفظ ایوارڈ کے پانچویں ایڈیشن کا بھی افتتاح کیا گیا

دارالقرآن الکریم کے میڈیا سینٹر کے مسئول وسام نذیر الدلفی نے بتایا کہ افتتاحی تقریب میں حرمِ امام حسینؑ کے متولیِ شرعی شیخ عبدالمہدی کربلائی، سیکرٹری جنرل حسن رشید العبایچی، مختلف شعبہ جات کے سربراہان، دینی و علمی شخصیات اور شریک ممالک کے نمائندوں نے شرکت کی

انہوں نے مزید بتایا کہ تقریب کا آغاز مصر کے معروف بین الاقوامی قاری شیخ عبد الفتاح الطاروطی کی دلنشین تلاوتِ قرآن مجید سے ہوا، جس کے بعد حوزۂ علمیہ کے استاد سید ریاض الحکیم اور دارالقرآن الکریم کے سربراہ شیخ ڈاکٹر خیر الدین علی الہادی نے خطاب کیا

تقریب کے دوران ایک دستاویزی فلم بھی پیش کی گئی جس میں کربلا انٹرنیشنل قرآنی ایوارڈ کے قیام، اس کے مختلف مراحل اور گزشتہ ادوار کی نمایاں کامیابیوں کو اجاگر کیا گیا۔ علاوہ ازیں مختلف ممالک سے تعلق رکھنے والے قرآنی بچوں نے اپنی صلاحیتوں کا شاندار مظاہرہ کیا، جبکہ شاعر ایہاب المالکی نے عیدِ غدیر کی مناسبت سے ایک منظوم نذرانۂ عقیدت پیش کیا

وسام الدلفی کے مطابق بین الاقوامی قرآنی ہفتہ حرمِ امام حسینؑ کی نمایاں قرآنی سرگرمیوں میں شمار ہوتا ہے، جو مختلف اسلامی ممالک کے قراء، حفاظ اور قرآنی امور سے وابستہ شخصیات کو ایک مشترکہ پلیٹ فارم پر جمع کرتا ہے۔ اس ہفتے کے دوران قرآنی مقابلوں، علمی نشستوں، ثقافتی پروگراموں اور مختلف معرفتی سرگرمیوں کا انعقاد کیا جائے گا

افتتاحی تقریب میں علمائے کرام، جامعاتی شخصیات، مقدس روضوں اور مزارات کے نمائندوں کے علاوہ زائرینِ امام حسینؑ کی بڑی تعداد نے بھی شرکت کی