مرجعِ دینی آیت اللہ العظمیٰ شیخ محمد اسحاق فیاضؒ کو نجف اشرف میں ان کی وصیت کے مطابق سپردِ خاک کر دیا گیا

مرجعِ عالی قدر آیت اللہ العظمیٰ شیخ محمد اسحاق فیاض رضوان اللہ تعالیٰ علیہ کی تشییعِ جنازہ کے دل سوز اور رقت انگیز مناظر کاظمین، کربلائے معلیٰ اور نجف اشرف میں دیکھنے کو ملے، جہاں لاکھوں مؤمنین، علماء، طلابِ علومِ دینیہ اور عقیدت مندوں نے اپنے محبوب مرجع کو پرسۂ عقیدت پیش کیا۔ یہ مناظر ہر آنکھ کو اشکبار اور ہر دل کو غمگین کر رہے تھے

آپؒ نے اپنی بابرکت زندگی کے 96 برس دینِ مبین اسلام، مکتبِ اہل بیتؑ، تدریس، تحقیق، فقاہت اور تربیتِ طلاب کے لیے وقف کیے۔ آپؒ کا شمار عصرِ حاضر کے ممتاز مراجعِ عظام میں ہوتا تھا۔ آپ کی علمی گہرائی، زہد و تقویٰ، سادگی، اخلاص اور امتِ مسلمہ کی رہنمائی میں ادا کیا جانے والا کردار ہمیشہ یاد رکھا جائے گا

آیت اللہ العظمیٰ شیخ اسحاق فیاضؒ نے اپنی گرانقدر علمی میراث، فقہی آثار اور شاگردوں کی ایک ایسی نسل چھوڑی ہے جو آنے والے زمانوں میں بھی ان کے افکار و تعلیمات کو زندہ رکھے گی۔ ان کی رحلت نہ صرف حوزۂ علمیہ نجف اشرف بلکہ پورے عالمِ اسلام کے لیے ایک عظیم سانحہ اور ناقابلِ تلافی نقصان ہے

اللہ رب العزت اس عظیم خادمِ دین کے درجات کو بلند سے بلند تر فرمائے، انہیں محمد و آلِ محمدؐ کے جوارِ رحمت میں اعلیٰ مقام عطا فرمائے، ان کی علمی، دینی اور روحانی خدمات کو صدقۂ جاریہ قرار دے، اور ہمیں ان کے علمی و اخلاقی نقوشِ قدم پر چلنے کی توفیق عطا فرمائے۔ آمین یا رب العالمین