وکیلِ مرجعِ دینیِ اعلیٰ، شیخ عبدالمہدی کربلائی نے حرمِ مطہر امام حسینؑ میں منعقدہ پانچویں بین الاقوامی نداء الاقصیٰ کانفرنس میں شریک وفود سے خصوصی ملاقات کی

اس موقع پر انہوں نے کہا کہ حرمِ امام حسینؑ فلسطین کے مسئلے کے حوالے سے اپنی دینی اور انسانی ذمہ داری کو مدنظر رکھتے ہوئے ہر سال اس کانفرنس کا انعقاد کرتا ہے، تاکہ فلسطینی عوام کی آواز عالمی برادری تک مؤثر انداز میں پہنچائی جا سکے

شیخ عبدالمہدی کربلائی نے کہا کہ فلسطین کا حق و انصاف پر مبنی مقدمہ ظلم و استبداد کے سامنے اسی وقت ثابت قدم رہ سکتا ہے جب فلسطینی عوام نہضتِ امام حسینؑ اور آپؑ کی سیرت سے رہنمائی اور استقامت کا درس حاصل کریں۔ انہوں نے واضح کیا کہ اللہ تعالیٰ نے اس حسینی نہضت کی حرارت ہمیشہ کے لیے اہلِ ایمان کے دلوں میں زندہ رکھی ہے

انہوں نے کہا کہ اس حرارت سے مراد حق پر کامل ایمان، اصولوں پر ثابت قدمی اور اس یقین کا راسخ ہونا ہے کہ مظلوم بالآخر ضرور کامیاب ہوگا، خواہ جدوجہد کتنی ہی طویل ہو اور قربانیاں کتنی ہی عظیم کیوں نہ ہوں

انہوں نے مزید کہا کہ فلسطینی عوام آج جن مظالم، قتل و غارت اور آزمائشوں کا سامنا کر رہے ہیں، وہ اس حقیقت کو تبدیل نہیں کر سکتے کہ فتح، جلد یا بدیر، حق و انصاف کے علمبرداروں اور اپنے جائز حق پر ثابت قدم رہنے والوں ہی کے حصے میں آئے گی

انہوں نے اس بات پر بھی زور دیا کہ اللہ تعالیٰ کی سنت یہ ہے کہ انسانوں اور اقوام کو آزمائشوں سے گزارتا ہے، اور حقیقی کامیابی انہی قوموں کو نصیب ہوتی ہے جو اپنے دینی و اخلاقی اصولوں پر ثابت قدم رہتے ہوئے اللہ تعالیٰ کی رضا کے مطابق زندگی بسر کرتی ہیں