حرمِ امام حسینؑ کے شعبۂ امورِ دینیہ کے ذیلی ادارے، صادق الامین فکری و ثقافتی مرکز کی جانب سے ضلع تلعفر میں عیدِ غدیر کی مناسبت سے ایک شاندار اور پُروقار تقریب کا انعقاد کیا گیا، جس میں مقامی مؤمنین اور مختلف سماجی و دینی شخصیات نے بھرپور شرکت کی

عیدِ غدیر ہمیں متحد کرتی ہے کے عنوان سے منعقد ہونے والی اس تقریب کا مقصد عیدِ غدیر کی عظیم اسلامی مناسبت کو منانا، ولایتِ اہلِ بیتؑ کے پیغام کو عام کرنا اور امیرالمؤمنین حضرت علی ابن ابی طالبؑ کی سیرتِ مبارکہ سے وابستگی کو فروغ دینا تھا

تقریب میں مختلف دینی، ثقافتی اور فکری سرگرمیوں کا اہتمام کیا گیا، جن میں مقررین نے واقعۂ غدیر کی اہمیت، اس کے اعتقادی و تاریخی پہلوؤں اور اسلامی معاشرے میں اس کے اثرات پر روشنی ڈالی

شعبۂ صادق الامین فکری و ثقافتی مرکز موصل کے مسئول شیخ خلیل العیلیاوی کے مطابق تقریب سے سید منتظر الحیدری نے خصوصی خطاب کرتے ہوئے واقعۂ غدیر کے فکری، اعتقادی اور تاریخی ابعاد پر تفصیلی گفتگو کی۔ انہوں نے اس بات پر زور دیا کہ ولایتِ امیرالمؤمنین حضرت علیؑ سے تمسک امتِ مسلمہ کی ہدایت اور کامیابی کی ضمانت ہے

بعد ازاں مرجعیتِ عالیہ کے نمائندے سید حسین اصلان نے اپنے خطاب میں شرکاء کا خیرمقدم کرتے ہوئے تلعفر کے عوام کی اس مبارک مناسبت کے احیاء اور اس میں بھرپور شرکت کو سراہا۔ انہوں نے غدیر کو دینِ اسلام کی تکمیل، امت کی وحدت اور الٰہی قیادت کے تسلسل کا بنیادی ستون قرار دیتے ہوئے امیرالمؤمنین حضرت علیؑ کے فضائل، مناقب اور اسلامی خدمات پر روشنی ڈالی

تقریب کے دوران شعراء اور منقبت خواں حضرات نے عیدِ غدیر کی مناسبت سے منظوم نذرانۂ عقیدت پیش کیے، جن کے ذریعے اہلِ بیتؑ سے محبت، ولایت سے وابستگی اور اس عظیم عید کی خوشیوں کا اظہار کیا گیا۔ اس موقع پر روحانی مسرت، ایمانی جذبے اور ولائی عقیدت کی دلنشین فضا قائم رہی

تقریب کے اختتام پر اس کامیاب پروگرام کے انعقاد میں حصہ لینے والے شرکاء، معاونین اور خدمت گزاروں کو اعزازی اسناد اور تحائف پیش کیے گئے، جبکہ عیدِ غدیر کے پیغام کو عام کرنے اور اس اہم دینی شعیرے کے احیاء میں ان کی خدمات کو خراجِ تحسین پیش کیا گیا