کراچی بار ایسوسی ایشن کے زیرِ اہتمام سالانہ "یومِ حسینؑ" کی ایک پروقار تقریب آج بروز جمعرات، 23 جولائی 2026ء کو جناح آڈیٹوریم، سٹی کورٹ کراچی میں منعقد ہوئی

کراچی بار ایسوسی ایشن کے زیرِ اہتمام سالانہ "یومِ حسینؑ" کی ایک پروقار تقریب آج بروز جمعرات، 23 جولائی 2026ء کو جناح آڈیٹوریم، سٹی کورٹ کراچی میں منعقد ہوئی، جس میں وکلاء برادری، جج صاحبان، سینئر قانون دانوں، مذہبی و سماجی شخصیات، مختلف مکاتبِ فکر کے نمائندوں اور طلبہ کی بڑی تعداد نے شرکت کی۔

تقریب کا آغاز تلاوتِ کلامِ پاک سے ہوا، جس کے بعد بار ایسوسی ایشن کے ذمہ داران نے مہمانوں کا خیرمقدم کرتے ہوئے کہا کہ "یومِ حسینؑ" کے انعقاد کا مقصد حضرت امام حسین علیہ السلام کی عظیم قربانی، واقعۂ کربلا کے عالمگیر پیغام اور عدل، انصاف، حریت، انسانی وقار اور حق و باطل کے درمیان واضح امتیاز کو اجاگر کرنا ہے۔

مقررین نے اپنے خطابات میں کہا کہ امام حسین علیہ السلام نے میدانِ کربلا میں اپنی اور اپنے اہلِ بیتؑ و اصحاب کی بے مثال قربانیاں پیش کرکے یہ ثابت کیا کہ ظلم، جبر، آمریت اور باطل قوتوں کے سامنے سر جھکانا اہلِ ایمان کا شیوہ نہیں۔ انہوں نے کہا کہ واقعۂ کربلا صرف ایک تاریخی سانحہ نہیں بلکہ ہر دور کے انسان کے لیے حق، انصاف، آزادی، عزتِ نفس اور انسانی اقدار کے تحفظ کا ایک دائمی منشور ہے۔

تقریب سے خطاب کرتے ہوئے مقررین نے اس بات پر زور دیا کہ قانون کے شعبے سے وابستہ افراد پر یہ خصوصی ذمہ داری عائد ہوتی ہے کہ وہ حضرت امام حسین علیہ السلام کی سیرت سے رہنمائی لیتے ہوئے معاشرے میں عدل و انصاف، قانون کی بالادستی، مظلوموں کی حمایت اور انسانی حقوق کے تحفظ کے لیے اپنی پیشہ ورانہ ذمہ داریاں دیانت داری کے ساتھ انجام دیں۔

اس موقع پر مقررین نے کہا کہ اگر معاشرہ امام حسین علیہ السلام کی تعلیمات، ایثار، استقامت، صداقت اور حق گوئی کو اپنا شعار بنا لے تو ظلم، ناانصافی، کرپشن اور معاشرتی بے راہ روی کا مؤثر خاتمہ ممکن ہے۔ انہوں نے نوجوان نسل پر زور دیا کہ وہ واقعۂ کربلا کے حقیقی پیغام کو سمجھیں اور اسے اپنی عملی زندگی میں نافذ کریں۔

تقریب کے اختتام پر شرکاء نے پاکستان کی سلامتی، استحکام، عدل و انصاف کے قیام، امتِ مسلمہ کے اتحاد اور عالمِ اسلام میں امن و سلامتی کے لیے خصوصی دعا بھی کی گئی۔