حرم حضرت عباس علیہ السلام کے زیرِ اہتمام الکفیل نرسری میں رواں سال کے آغاز سے اب تک نباتاتی ذخیرے میں دو لاکھ پچیس ہزار سے زائد پودوں کا اضافہ کیا گیا ہے

نرسری کے معاون مسئول، جناب علی حمزہ سالم نے بتایا کہ یونٹ برائے افزائشِ نباتات کے عملے نے رواں سال کے ابتدائی چار ماہ کے دوران دو لاکھ پچیس ہزار سے زائد پودے تیار کر کے نباتاتی ذخیرے میں شامل کیے۔ یہ اقدام نباتاتی تنوع کو فروغ دینے اور حرمِ مطہر میں پھولوں اور پودوں کی ضروریات پوری کرنے کے منصوبے کا حصہ ہے

انہوں نے مزید کہا کہ اس سال شامل کیے گئے پودوں میں بیرونی، موسمی اور پھلدار اقسام شامل ہیں، جن کی پنیری جدید زرعی طریقوں کے مطابق گرین ہاؤسز اور سایہ دار شیڈز میں تیار کی گئی

انہوں نے واضح کیا کہ اس اضافے کا مقصد گروپ کی نرسریوں، حرمِ مطہر کے مختلف شعبہ جات اور ضریحِ مبارک کی ضروریات پوری کرنا ہے۔ اس کے علاوہ یہ پودے مناسب قیمتوں پر عام خاندانوں، نجی نرسری مالکان اور سرکاری و نجی اداروں کو کربلا مقدسہ کے اندر اور باہر بھی فراہم کیے جا رہے ہیں۔

معاون مسئول نے مزید بتایا کہ یہ پودے ماحولیاتی اور موسمی حالات سے مطابقت رکھنے کی صلاحیت رکھتے ہیں، جبکہ الکفیل نرسری زرعی سیزن کے دوسرے مرحلے کے لیے افزائشِ نباتات کا عمل بھی مسلسل جاری رکھے ہوئے ہے