حرمِ امام حسینؑ کے متولیِ شرعی کی خصوصی ہدایت پر آنکھوں کے امراض میں مبتلا مریضوں کے لیے رعایتی طبی سہولیات فراہم کرنے کی غرض سے سیدہ خدیجہؑ اسپتال برائے خواتین میں نورِ عافیہ آئی میڈیکل کیمپ کا آغاز کر دیا گیا ہے

اسپتال کی ڈائریکٹر ڈاکٹر بیداء ابراہیم التمیمی کے مطابق، یہ کیمپ 4 اپریل سے شروع کیا گیا ہے اور یہ حرمِ امام حسینؑ کی جانب سے عوام، خصوصاً کم آمدنی اور مستحق خواتین کے لیے وقتاً فوقتاً فراہم کی جانے والی رعایتی طبی خدمات کے سلسلے کی ایک اہم کڑی ہے۔ اس مہم کا بنیادی مقصد ضرورت مند خواتین کو معیاری اور کم خرچ علاج کی سہولت فراہم کرنا ہے

انہوں نے بتایا کہ یہ مہم ایک ماہ تک جاری رہے گی اور اس میں صرف آنکھوں کے امراض کا علاج کیا جائے گا۔ مریضوں کا انتخاب اسپتال کی جانب سے کیے گئے سروے اور دستیاب اعداد و شمار کی بنیاد پر کیا جاتا ہے، تاکہ زیادہ سے زیادہ مستحق افراد کو ترجیح دی جا سکے

مہم کے تحت شامل اہم علاج و آپریشنز: موتیا اور لینز کی پیوندکاری

ایک آنکھ کے بھینگے پن کی درستگی

آنسو کی نالی کی بندش کا علاج

پلک کے گرنے کی اصلاح

ڈاکٹر التمیمی نے مزید بتایا کہ ہر آپریشن کی لاگت صرف 300,000 عراقی دینار مقرر کی گئی ہے، جو محض آپریشنل اخراجات پر مشتمل ہے اور اس میں کسی قسم کا اضافی منافع شامل نہیں۔ یہ اخراجات دیگر نجی اسپتالوں کے مقابلے میں تقریباً 20 فیصد تک کم ہیں

انہوں نے واضح کیا کہ تمام سرجریز ماہر اور تجربہ کار خواتین ڈاکٹرز کی ٹیم کے ذریعے انجام دی جائیں گی، جبکہ طبی و نرسنگ عملہ جدید طبی آلات اور جدید ٹیکنالوجی کے ساتھ مکمل نگرانی فراہم کرے گا

آخر میں انہوں نے کہا کہ اس مہم کو عوام کی جانب سے بھرپور پذیرائی حاصل ہو رہی ہے، اور متعدد خواتین نے اس بات پر اطمینان کا اظہار کیا ہے کہ اب وہ کم خرچ میں آنکھوں کا معیاری علاج کروا سکتی ہیں، جو پہلے مالی مشکلات کے باعث ممکن نہ تھا