تعلیماتِ اسلامی اور نہج البلاغہ کے آفاقی پیغام کو مغربی دنیا تک پہنچانے میں گراں قدر خدمات کے اعتراف کے طور پر بین الاقوامی کونسل برائے مذہبی و انسانی مکالمہ کے زیرِ اہتمام ناروے کے دارالحکومت اوسلو میں محققہ نورا سونِیوا ایگن کے اعزاز میں ایک باوقار تقریب منعقد کی گئی

یہ تقریب اوسلو میں واقع مرکزی لائبریری میں منعقد ہونے والی بین الاقوامی نشست کے موقع پر منعقد ہوئی، جہاں ادیان کے امور کی ماہر محققہ ڈاکٹر نورا سونِیوا ایگن (Dr. Nora Sunniva Eggen) نے ایک تجزیاتی مقالہ پیش کیا۔ مقالے میں انہوں نے کتاب نہج البلاغہ کا تفصیلی جائزہ لیتے ہوئے اس کی فکری و انسانی اقدار، نیز اس کے تہذیبی اور تمدنی پہلوؤں کو اجاگر کیا۔

ڈاکٹر نورا سونِیوا ایگن اُن نمایاں محققین میں شمار ہوتی ہیں جو اسلامی ورثے کو مغربی دنیا تک منتقل کرنے میں خصوصی دلچسپی رکھتی ہیں۔ انہوں نے نہج البلاغہ کا ناروے کی زبان میں ترجمہ کیا ہے، اس کے علاوہ متعدد اہم اسلامی کتب اور مصادر کو بھی ترجمہ کر کے مغربی قارئین تک پہنچایا ہے۔

ان کی علمی، تحقیقی اور ترجماتی خدمات کے اعتراف میں بین الاقوامی کونسل برائے مذہبی و انسانی مکالمہ کے سیکرٹری جنرل ڈاکٹر علی موسیٰ الموسوی نے انہیں تعریفی سند پیش کی۔ یہ اعزاز مشرق و مغرب کے درمیان تہذیبی مکالمے کے فروغ اور ثقافتی روابط کے استحکام میں ان کی گراں قدر خدمات کا اعتراف ہے