حرمِ امام حسین علیہ السلام نے اصلاحِ نوجوان پروگرام کے تحت امریکی جامعات کے طلبہ پر مشتمل ایک وفد کی میزبانی کی

حرم امام حسین علیہ السلام کے شعبۂ میڈیا کے ذیلی ادارے، بین الاقوامی میڈیا سینٹر کے زیرِ اہتمام اس وفد کا استقبال کیا گیا، جس میں ریاستہائے متحدۂ امریکہ کی مختلف جامعات کے طلبہ شامل تھے

ان نوجوانوں کا دورۂ عراق مرجعِ دینی اعلیٰ کے وکیل، سماحة السید محمد باقر الکشميری (دام ظلّه) سے وابستہ مؤسسۂ امام کے تعاون سے ممکن ہوا۔ وفد نے اپنے قیام کے دوران عتبۂ حسینیۂ مقدسہ کی جانب سے جاری مختلف ثقافتی، انسانی اور خدماتی منصوبوں کا مشاہدہ کیا

اس دورے کا بنیادی مقصد نوجوانوں کو عتباتِ مقدسہ کے سماجی خدمت، انسانی اقدار کے فروغ اور معاشرتی فلاح میں ادا کیے جانے والے مؤثر کردار سے روشناس کرانا تھا

بین الاقوامی میڈیا سینٹر کے ڈائریکٹر، استاد حیدر المنکوشی نے اس موقع پر کہا کہ یہ دورہ ایک منظم پروگرام کا حصہ ہے، جس کے تحت مرکز دنیا کے مختلف ممالک سے آنے والے نوجوانوں کی میزبانی کرتا ہے۔ انہوں نے بتایا کہ اس پروگرام کے تحت موسمِ سرما اور گرما کی تعطیلات کے دوران مختلف کیمپس منعقد کیے جاتے ہیں، تاکہ بیرونِ عراق مقیم نوجوانوں کا عتباتِ مقدسہ اور مزاراتِ دینیہ سے روحانی اور ثقافتی تعلق مضبوط ہو سکے۔

انہوں نے مزید کہا کہ اس پروگرام کا مقصد نوجوانوں کے ساتھ مؤثر روابط قائم کرنا اور انہیں عتبۂ حسینیۂ مقدسہ کے تحت انجام دیے جانے والے انسانی، ثقافتی اور خدماتی منصوبوں سے آگاہ کرنا ہے، تاکہ عراق کی حقیقی تصویر اور اس کے پیغامِ انسانیت و رسالت کو عالمی معاشروں تک منتقل کیا جا سکے

استاد المنکوشی نے اس امر پر بھی زور دیا کہ بین الاقوامی میڈیا سینٹر ایسے دوروں کو ثقافتی مکالمے اور علمی تبادلے کے ایک مؤثر پلیٹ فارم کے طور پر فروغ دینا چاہتا ہے، تاکہ اقوامِ عالم کے درمیان مشترکہ انسانی اقدار کو تقویت دی جا سکے، جو مکتبِ امام حسین علیہ السلام کے اصولوں سے ماخوذ ہیں