حرمِ امام حسین علیہ السلام نے حضرت سیدہ فاطمہ زہراء سلام اللہ علیہا کی ولادت باسعادت کی مناسبت سے چوتھے بین الاقوامی جشنِ کوثر العصمة کی تمام تر تیاریاں مکمل کر لی ہیں

اس پُروقار جشن میں ملکی و غیر ملکی شخصیات کے ساتھ ساتھ حوزۂ علمیہ نجفِ اشرف کے نامور اساتذہ بھی شرکت کریں گے

حرم کے شعبۂ مذہبی جشن و تقاریب کے مسؤول جناب علی کاظم سلطان نے کربلا ٹوڈے نیوز ایجنسی کو بتایا کہ یہ جشن صدیقۂ طاہرہ حضرت فاطمہ الزہراء سلام اللہ علیہا کی ولادت کی مناسبت سے منعقد کیا جا رہا ہے۔ یہ جشن چار روز تک جاری رہے گا اور اس میں متعدد پروگرام شامل ہوں گے، جن میں حوزۂ علمیہ کے فضلاء اور مختلف جامعات کے اساتذہ کی علمی نشستیں، ایک خصوصی فنی نمائش، اور اس سال بالغ ہونے والی بچیوں کے لیے تقریبِ جشنِ بلوغت بھی شامل ہے

انہوں نے مزید بتایا کہ علمی نشستوں میں جنابِ سیدہ سلام اللہ علیہا کی حیاتِ طیبہ کے مختلف پہلوؤں پر تحقیقی و علمی مقالات پیش کیے جائیں گے

مزید کہا کہ جشن میں ’کوثر العصمة‘ فنی نمائش کا بھی افتتاح کیا جائے گا، جس میں کئی شعبے، ورکشاپس، تربیتی و تعلیمی اسٹیشنز اور دیگر سرگرمیاں شامل ہوں گی

آخر میں انہوں نے بتایا کہ جشن کے دوران مختلف قرآنی و ثقافتی محافل کا اہتمام کیا جائے گا، جبکہ معزز مہمانوں کو حرمِ حسینی کے زیرانتظام جاری منصوبوں کا دورہ بھی کروایا جائے گا۔ اسی طرح بعض جامعات، اسکولوں اور سرکاری اداروں میں بھی اس مبارک موقع کی مناسبت سے خصوصی تقریبات منعقد کی جائیں گی