عتبہ حسینیہ، عتبہ علویہ اور حوزۂ علمیہ قم کے اشتراک سے منعقد ہونے والی بین الاقوامی محقق میرزا محمد حسین النائینیؒ کانفرنس کی اختتامی تقریب حرم امام حسین علیہ السلام کے صحن میں منعقد ہوئی

تقریب سے خطاب کرتے ہوئے حرم امام حسین علیہ السلام کے شعبۂ امورِ دینیہ کے سربراہ، شیخ احمد الصافی نے کہا کہ عظیم علمی شخصیات کی یاد منانا اور ان کی سیرت و خدمات کا اجاگر کرنا نہایت اہم ہے، تاکہ طلاب کے لیے بہترین نمونہ فراہم ہو سکے

اس موقع پر مرجع عالی قدر کے نمائندے شیخ عبدالمہدی کربلائی، حوزۂ علمیہ کے جلیل القدر اساتذہ، محققین اور متعدد علمی و سماجی شخصیات نے شرکت کی

شیخ احمد الصافی نے کہا کہ علم، علماء اور علمی و تحقیقی اداروں کی سرپرستی عتبۂ حسینیہ کی قدیم روایت رہی ہے، اور متولیِ شرعی و نمائندۂ مرجعیتِ علیا، شیخ عبدالمہدی کربلائی ہمیشہ اس پہلو پر خصوصی توجہ دیتے آئے ہیں

انہوں نے واضح کیا کہ یہ سرپرستی دینی مدارس و معاہد کی معاونت، علمی موسوعات کی طباعت، علماء کے آثار کی نشر و اشاعت اور متعدد علمی کانفرنسوں کے انعقاد کی صورت میں ظاہر ہوتی ہے، جن میں *مؤتمر شیخ ابن فہد حلی* اور *مؤتمر شیخ وحید بہبہانی* قابلِ ذکر ہیں، جن کی تالیفات بھی شائع کی گئیں

مزید برآں، عتبہ حسینیہ نے مرحوم علامہ سید محمد مہدی الخرسان کی تصانیف  کے احیاء اور طباعت کا عظیم کام بھی انجام دیا، جس سے وہ اپنی حیات میں نہایت مسرور تھے، اور یہ خدمت محققین اور اہلِ علم کے بھرپور تعاون سے مکمل ہوئی

انہوں نے کہا کہ یہ تمام اقدامات اس بات کی علامت ہیں کہ علمی شخصیات کی تکریم کا سلسلہ مستقل جاری رہے گا، اور امکان ہے کہ آئندہ  شریف العلماء المازندرانی کی حیات و خدمات پر بھی ایک علمی کانفرنس منعقد کی جائے

آخر میں انہوں نے کہا کہ مجالس، محافل اور علمی کانفرنسوں کا یہ سلسلہ ان شاء اللہ ،محققین اور اہلِ قلم کی کوششوں سے جاری و برقرار رہے گا، جو علماء کے علمی ورثے کو زندہ رکھنے کے لیے اپنی قیمتی کاوشیں پیش کر رہے ہیں

واضح رہے کہ یہ کانفرنس دونوں مقدس عتبتین (حسینیہ و علویہ) کے مشترکہ علمی پروگراموں کا حصہ ہے، جن کا مقصد علمی و فکری تحریک کو تقویت دینا اور مدرسۂ اہلِ بیتؑ کے نامور اکابرین کے علمی تراث کو احیاء بخشنا ہے