عراق کے صوبہ بصرہ میں عیدِ غدیرِ اَغر کی مناسبت سے ملک کا سب سے بڑا غدیری پرچم لہرایا گیا۔ یہ تاریخی تقریب چودھویں بین الاقوامی ہفتۂ امامت فیسٹیول کے تحت منعقد ہوئی، جس میں مختلف شعبہ ہائے زندگی سے تعلق رکھنے والی شخصیات اور عوام کی بڑی تعداد نے شرکت کی

حرم امیر المؤمنین حضرت علی علیہ السلام کے انتظامی امور کے نگران احمد الزورکانی نے اس موقع پر بتایا کہ بصرہ میں ہونے والی یہ پرچم کشائی اپنی نوعیت کی سب سے نمایاں تقریب تھی، کیونکہ یہاں 200 مربع میٹر رقبے پر مشتمل (10 × 20 میٹر) سائز کا غدیری پرچم نصب کیا گیا۔ اس پرچم کو 72 میٹر بلند ستون پر لہرایا گیا، جو تمام صوبوں میں سب سے بلند اور سب سے بڑا غدیری پرچم قرار پایا

انہوں نے مزید بتایا کہ یہ پرچم مؤسسہ "قمر بنی ہاشم" کی جانب سے بصرہ کے وسط میں واقع "ساحة الحریة" میں نصب کیا گیا

واضح رہے کہ عتبہ علویہ کے زیر اہتمام عراق کے 30 سے زائد شہروں میں غدیری پرچم کشائی کی تقریبات منعقد کی جا رہی ہیں، جن کا مقصد عیدِ غدیر کی عظمت کو اجاگر کرنا اور ولایت و امامت سے وابستگی اور عقیدت کا اظہار ہے

الزورکانی کے مطابق یہ سرگرمیاں ہفتۂ غدیر کے بین الاقوامی پروگرام کا حصہ ہیں، جن کا مقصد ثقافتِ غدیر کو فروغ دینا اور اس کے عقائدی، تاریخی اور انسانی پہلوؤں کو نمایاں کرنا ہے۔