بغداد: عراق اور ترکی کے درمیان پانی کی تقسیم کے معاہدے کے مؤثر نفاذ کے لیے اہم پیشرفت ہوئی ہے۔ عراقی وزیر برائے آبی وسائل عون ذیاب عبداللہ نے بغداد میں ترک نائب وزیر خارجہ بیریس اَکِنچی سے ملاقات کی، جس میں عراق میں ترکیہ کے سفیر بھی شریک تھے

اس ملاقات میں دونوں ممالک کے درمیان آبی وسائل کے انتظام اور پانی کی منصفانہ تقسیم سے متعلق امور پر تفصیلی تبادلہ خیال کیا گیا

وزارتِ آبی وسائل کی جانب سے جاری کردہ بیان کے مطابق، اجلاس میں دریائے دجلہ و فرات سے عراق کے لیے پانی کے حصے کے تعین، آئندہ گرمیوں میں پانی کی ممکنہ قلت سے نمٹنے، اور پانی کے ذخیرے کے لیے جدید ڈیموں کی تعمیر پر خصوصی گفتگو ہوئی۔ اس کے علاوہ، دونوں ممالک نے پانی کے شعبے میں طے شدہ فریم ورک معاہدے کو فعال بنانے اور اس کے مؤثر نفاذ کے لیے عملی اقدامات پر بھی غور کیا

عراقی وزیر نے معاہدے کے تحت منصوبوں پر فوری عمل درآمد کی ضرورت پر زور دیتے ہوئے بتایا کہ چھ کلیدی منصوبے متعین کیے گئے ہیں۔ ان میں سے تین آبپاشی اور نکاسی کے جدید نیٹ ورکس کے قیام پر مرکوز ہیں، جبکہ دیگر تین منصوبے پانی کے ذخائر کے لیے ڈیموں کی تعمیر سے متعلق ہیں۔ وزیر نے واضح کیا کہ جنوبی عراق کے کسانوں کی ضروریات پوری کرنے کے لیے جدید پائپ لائن ٹیکنالوجی کے ذریعے پانی کی منتقلی کا ایک اسٹریٹجک آبپاشی منصوبہ بھی شامل ہے

مزید برآں، عراقی وزیر نے ترکیہ کے ساتھ تکنیکی تعاون کی اہمیت پر روشنی ڈالتے ہوئے بتایا کہ مشترکہ تکنیکی کمیٹیاں تشکیل دی گئی ہیں جو ان منصوبوں کے نفاذ کی نگرانی کریں گی اور جدید معیارات کے مطابق ڈیزائنز کو اپ ڈیٹ کریں گی