بغداد: عراق کے دارالحکومت بغداد میں 48ویں بین الاقوامی صنعتی میلے کا باضابطہ آغاز ہوگیا، جس میں 20 ممالک اور 1000 سے زائد مقامی و بین الاقوامی کمپنیاں شرکت کر رہی ہیں

یہ میلہ تجارتی و ثقافتی تبادلے کے فروغ اور اقتصادی ترقی کے نئے مواقع فراہم کرنے کے لیے ایک اہم سنگ میل ثابت ہوگا

افتتاحی تقریب سے خطاب کرتے ہوئے عراقی وزیر تجارت اثیر داؤد الغریری نے کہا کہ یہ میلہ "سرمایہ کاری , ترقی و خوشحالی" کے نعرے کے تحت منعقد ہو رہا ہے اور 7 فروری تک جاری رہے گا۔ انہوں نے مزید کہا کہ یہ میلہ اپنی وسیع اور متنوع شرکت کے باعث ایک منفرد ایڈیشن ثابت ہوگا، جہاں مختلف اقتصادی شعبوں سے تعلق رکھنے والی عالمی اور مقامی کمپنیاں اپنی مصنوعات اور خدمات کی نمائش کر رہی ہیں

وزیر تجارت نے اس موقع پر بغداد بین الاقوامی صنعتی میلے کی اہمیت پر روشنی ڈالتے ہوئے کہا کہ یہ ایونٹ غیر ملکی سرمایہ کاروں کے لیے ایک کلیدی اقتصادی مرکز کی حیثیت رکھتا ہے۔ یہ مختلف شعبوں میں تجربات کے تبادلے، تجارتی تعلقات کے استحکام اور سرمایہ کاری کے فروغ کے لیے ایک بہترین پلیٹ فارم فراہم کرتا ہے

الغریری نے مزید وضاحت کی کہ اس سال کا میلہ پچھلے میلوں سے مختلف اور منفرد ہوگا، کیونکہ اس میں اقتصادی، ثقافتی اور فنی سرگرمیوں کا ایک متنوع امتزاج شامل کیا گیا ہے۔ انہوں نے کہا کہ یہ ایونٹ عراق کی اقتصادی ترقی، بین الاقوامی تعاون اور پائیدار ترقی کے فروغ کے عزم کی واضح عکاسی کرتا ہے

ماہرین کا ماننا ہے کہ یہ میلہ عراق کی معاشی بحالی اور عالمی سرمایہ کاری کے فروغ میں ایک اہم کردار ادا کرے گا، جو ملکی معیشت کے استحکام اور ترقی کی نئی راہیں ہموار کرے گا