قضاء تلعفر میں رسولِ اکرم حضرت محمد مصطفیٰ ص کی ولادتِ باسعادت کی مناسبت سے ایک پُروقار محفل میلاد کا انعقاد کیا گیا

یہ محفل حرم امام حسین علیہ السلام کے شعبۂ امورِ دینیہ کے زیرِ اہتمام مرکز صادق فکری و ثقافتی، موصل نے جامعہ تلعفر کے تعاون سے منعقد کی

یہ تقریب صوبہ نینویٰ میں منعقد ہونے والے آٹھویں سالانہ نبیِ رحمت فیسٹیول کی پہلی تقریب تھی

مرکز صادق امین فکری و ثقافتی کے ذمہ دار شیخ خلیل العلیاوی نے کربلاء ٹوڈے نیوز ایجنسی سے گفتگو کرتے ہوئے بتایا کہ تقریب کا آغاز تلاوتِ کلامِ پاک سے ہوا، جس کے بعد جامعہ تلعفر کے صدر ڈاکٹر عقیل الاعرجی نے استقبالیہ خطاب کیا

بعد ازاں حرم امام حسین علیہ السلام کے شعبۂ امورِ دینیہ کے سربراہ جناب شیخ احمد الصافی نے خطاب کیا

 انہوں نے رسولِ اکرم صلی اللہ علیہ وآلہ وسلم کی سیرتِ طیبہ کو خراجِ عقیدت پیش کرتے ہوئے ان عظیم اسلامی اقدار کو اجاگر کیا جو مسلمانوں کو باہم متحد کرتی اور ان کے درمیان محبت، اخوت اور اتحاد کے جذبے کو فروغ دیتی ہیں

تقریب سے دیوانِ وقفِ سنی کے نمائندے، نینویٰ کے مفتی اور تلعفر کے خطباء رابطہ کمیٹی کے رکن شیخ ہاشم عنتر سمیت دیگر شخصیات نے بھی خطاب کیا

مقررین نے رسولِ اکرم صلی اللہ علیہ وآلہ وسلم کی سیرتِ مبارکہ اور آپ کی رحمت و شفقت پر مبنی تعلیمات کو اجاگر کرتے ہوئے مسلمانوں کے درمیان اتحاد و یکجہتی کو مضبوط بنانے اور تفرقے سے اجتناب کی ضرورت پر زور دیا

محفل میں علمائے کرام، معززین، سرکاری و قبائلی شخصیات، سماجی رہنماؤں، جامعہ کے اساتذہ اور طلبہ سمیت مختلف شعبہ ہائے زندگی سے تعلق رکھنے والے افراد نے بھرپور شرکت کی

منتظمین کے مطابق یہ محفل دینی و علمی اداروں کے درمیان مشترکہ تعاون کی ایک عملی مثال ہے، جس کا مقصد اسلامی تعلیمات میں موجود محبت، بھائی چارے، باہمی ہم آہنگی اور اتحاد و یکجہتی کی اقدار کو فروغ دینا ہے