پاکستان بھر میں ایامِ شہادتِ حضرت فاطمہ زہرا سلام اللہ علیہا کی مناسبت سے مجالسِ عزا کا انعقاد کیا گیا، جن میں مومنین و مومنات کی بڑی تعداد نے شرکت کرکے دخترِ رسول اکرم حضرت محمد مصطفیٰ صلی اللہ علیہ وآلہ وسلم سے اپنی عقیدت و محبت کا اظہار کیا

کراچی: پاکستان بھر میں ایامِ شہادتِ حضرت فاطمہ زہرا سلام اللہ علیہا کی مناسبت سے مجالسِ عزا کا انعقاد کیا گیا، جن میں مومنین و مومنات کی بڑی تعداد نے شرکت کرکے دخترِ رسول اکرم حضرت محمد مصطفیٰ صلی اللہ علیہ وآلہ وسلم سے اپنی عقیدت و محبت کا اظہار کیا۔ ان مجالس میں سے سب سے بڑا اجتماع کراچی کے معروف نشتر پارک میں منعقد ہوا، جہاں پانچ روزہ مجالسِ عزا میں ہزاروں عزاداروں نے شرکت کی۔

ان مجالسِ عزا سے ممتاز عالمِ دین جناب سید علی رضا رضوی صاحب نے خطاب کیا۔ انہوں نے اپنے خطابات میں حضرت فاطمہ زہرا سلام اللہ علیہا کی عظیم شخصیت، مقام و منزلت، سیرتِ طیبہ اور فضائل و مناقب پر روشنی ڈالتے ہوئے آپ کی زندگی کو امتِ مسلمہ کے لیے ایک روشن نمونہ قرار دیا۔ انہوں نے سیدہ زہرا سلام اللہ علیہا کی حیاتِ مبارکہ کے مختلف پہلوؤں کو بیان کرتے ہوئے آپ کے کردار، عبادت، تقویٰ، صبر و استقامت اور دینِ اسلام کے دفاع میں آپ کے مؤثر کردار کو اجاگر کیا۔

پانچ روز تک جاری رہنے والی ان مجالس میں سیدہ فاطمہ زہرا سلام اللہ علیہا کی سیرت اور رسول اکرم صلی اللہ علیہ وآلہ وسلم کے نزدیک آپ کے عظیم مقام و مرتبے کو خصوصی طور پر بیان کیا گیا۔ مقرر نے اس بات پر زور دیا کہ حضرت فاطمہ زہرا سلام اللہ علیہا کی زندگی صرف تاریخ کا ایک اہم باب نہیں، بلکہ ایمان، اخلاص، حق پر ثابت قدمی، دینی بصیرت اور اخلاقی عظمت کا ایسا نمونہ ہے جس سے ہر دور میں رہنمائی حاصل کی جا سکتی ہے۔

مجالس کے دوران ایامِ فاطمیہ کی اہمیت، اہلِ بیت علیہم السلام کی تعلیمات سے وابستگی اور ان کے نقشِ قدم پر چلنے کی ضرورت پر بھی گفتگو کی گئی۔ اس موقع پر سیدہ زہرا سلام اللہ علیہا کی مظلومیت اور آپ کی قربانیوں کو یاد کرتے ہوئے اس امر کو اجاگر کیا گیا کہ اہلِ بیت علیہم السلام کی سیرت اور تعلیمات کو عام کرنا دینی و اخلاقی شعور کے فروغ اور معاشرے میں اسلامی اقدار کے استحکام کے لیے نہایت اہم ہے۔ مجالس کے دوران فضا سوگوار رہی اور عزاداروں نے اشکبار آنکھوں کے ساتھ دخترِ رسول صلی اللہ علیہ وآلہ وسلم کی مظلومیت کو یاد کیا اور اہلِ بیت اطہار علیہم السلام سے اپنی قلبی وابستگی اور وفاداری کا اظہار کیا۔