اسلام آباد: جامعہ الکوثر اسلام آباد میں ایامِ شہادتِ حضرت فاطمہ زہرا سلام اللہ علیہا کی مناسبت سے پانچ روزہ مجالسِ عزا کا انعقاد کیا گیا،

اسلام آباد: جامعہ الکوثر اسلام آباد میں ایامِ شہادتِ حضرت فاطمہ زہرا سلام اللہ علیہا کی مناسبت سے پانچ روزہ مجالسِ عزا کا انعقاد کیا گیا، جن میں راولپنڈی اور اسلام آباد کے مومنین و مومنات نے بڑی تعداد میں شرکت کی۔ ان مجالس سے علامہ شیخ محمد شفا نجفی نے خطاب فرمایا اور سیدہ فاطمہ زہرا سلام اللہ علیہا کی سیرتِ طیبہ، فضائل و مناقب اور تعلیمات پر روشنی ڈالی۔

پانچ روز تک جاری رہنے والی ان مجالس میں حضرت فاطمہ زہرا سلام اللہ علیہا کی حیاتِ مبارکہ، مقام و منزلت، رسول اکرم حضرت محمد مصطفیٰ صلی اللہ علیہ وآلہ وسلم کے نزدیک آپ کے عظیم مقام اور دینِ اسلام کی سربلندی کے لیے آپ کی خدمات کو یاد کیا گیا۔ اس موقع پر سیدہ زہرا سلام اللہ علیہا کی مظلومیت اور آپ کی زندگی کے مختلف پہلوؤں کو بیان کرتے ہوئے اہلِ بیت علیہم السلام سے تمسک اور ان کی تعلیمات پر عمل پیرا ہونے کی اہمیت کو اجاگر کیا گیا۔

علامہ شیخ محمد شفا نجفی نے اپنے خطابات میں سیرتِ حضرت فاطمہ زہرا سلام اللہ علیہا کی روشنی میں دینی و اخلاقی اقدار، صبر و استقامت، عبادت و بندگی اور معاشرتی ذمہ داریوں کی اہمیت پر گفتگو فرمائی۔ مجالس کا مقصد ایامِ فاطمیہ کی یاد کو زندہ رکھنا، اہلِ بیت علیہم السلام کی تعلیمات کو عام کرنا اور معاشرے میں دینی و اخلاقی شعور کو فروغ دینا تھا۔

ان مجالسِ عزا میں مومنین و مومنات کی کثیر تعداد نے بھرپور شرکت کی اور حضرت فاطمہ زہرا سلام اللہ علیہا سے اپنی گہری عقیدت و محبت کا اظہار کیا۔ مجالس کے دوران فضا سوگوار رہی اور شرکائے مجالس نے سیدہ کونین سلام اللہ علیہا کی عظیم شخصیت، سیرتِ طیبہ اور مظلومیت کو یاد کرتے ہوئے اہلِ بیت اطہار علیہم السلام کے ساتھ اپنی قلبی وابستگی اور محبت کا اظہار کیا۔