امریکی وزارتِ خزانہ کی جانب سے دی گئی محدود مدت کی رعایت کے تحت عراقی ایئرلائنز کو ایک ماہ کے لیے نجف انٹرنیشنل ایئرپورٹ سے ایران کے لیے پروازیں چلانے کی اجازت مل گئی ہے

عراقی ایئرلائنز نے آج پیر کے روز اعلان کیا ہے کہ نجف ایئرپورٹ کے ذریعے ایران کے مختلف ہوائی اڈوں کے لیے اپنی پروازیں دوبارہ شروع کر دی گئی ہیں

ذرائع کے مطابق، امریکی صدر ڈونلڈ ٹرمپ کی انتظامیہ ایران پر عائد پابندیوں سے محدود مدت کے لیے عراق کو استثنیٰ دینے پر غور کر رہی ہے، تاکہ شیعہ مسلمانوں کے لیے ایران اور عراق کے درمیان مذہبی زیارات کی غرض سے فضائی سفر ممکن بنایا جا سکے

مذاکرات میں شریک ایک ذریعے نے بتایا کہ امریکی وزارتِ خزانہ کی جانب سے دی جانے والی یہ رعایت فی الحال صرف ایک ماہ کے لیے عراقی ایئرلائنز کو نجف انٹرنیشنل ایئرپورٹ سے ایران کے لیے پروازیں چلانے کی اجازت دے گی، جبکہ بعد میں اس استثنیٰ کو مزید طویل مدت کے لیے بڑھائے جانے کا بھی امکان ہے

اس سے قبل ایران میں عراق کے سفیر یاسر عبد الزہراء نے کہا تھا کہ امریکی پابندیوں کے باعث پروازیں بند کیے جانے کے اعلان کے چند روز بعد نجف ایئرپورٹ 24 گھنٹوں کے اندر ایرانی پروازوں کے لیے دوبارہ کھول دیا جائے گا

عراقی سرکاری خبر رساں ایجنسی (واع) نے سفیر کے حوالے سے بتایا کہ وزیر اعظم علی الزیدی کی سربراہی میں عراقی حکومت دونوں ہمسایہ ممالک عراق اور ایران کے درمیان فضائی پروازیں بحال کرنے کے لیے مسلسل کوششیں کر رہی ہے

انہوں نے مزید کہا کہ حکومت کی جانب سے ایران کے ساتھ پروازیں بند کرنے کا کوئی فیصلہ نہیں کیا گیا تھا، بلکہ غیر ملکی گراؤنڈ سروسز فراہم کرنے والی کمپنیوں نے امریکی پابندیوں کے خدشے کے باعث اپنی خدمات فراہم کرنے سے گریز کیا تھا