اسلام آباد: حوزہ علمیہ نجف اشرف کے ممتاز استاد اور معروف عالمِ دین علامہ سید احمد اشکوری نے ایک وفد کے ہمراہ امام حسین ثقافتی سنٹر اسلام آباد کا دورہ کیا۔

اسلام آباد:حوزہ علمیہ نجف اشرف کے ممتاز استاد اور معروف عالمِ دین علامہ سید احمد اشکوری (دام عزہ) نے ایک وفد کے ہمراہ امام حسین ثقافتی سنٹر اسلام آباد کا دورہ کیا۔ اس موقع پر وکیلِ مرجعیت علامہ شیخ انور علی نجفی (دام عزہ) بھی ان کے ہمراہ تھے۔

معزز مہمانوں نے حرمِ مطہر امام حسینؑ کے شعبۂ اعلام کی جانب سے پاکستان میں دفتر کے قیام کو خوش آئند قرار دیتے ہوئے اسے دونوں ممالک کے درمیان دینی و ثقافتی روابط کے فروغ اور استحکام کی جانب ایک اہم قدم قرار دیا۔ انہوں نے کہا کہ اس دفتر کے ذریعے حرمِ امام حسینؑ کی علمی، دینی اور ثقافتی سرگرمیوں کو پاکستان میں مؤثر انداز سے متعارف کرانے کے ساتھ ساتھ پیغامِ حسینیؑ، معارفِ قرآن و اہل بیتؑ اور انسانی و اخلاقی اقدار کو عام کرنے کے لیے بھی مؤثر اقدامات کیے جا سکتے ہیں۔

علامہ سید احمد اشکوری نے اس اقدام کو بالخصوص بین المذاہب ہم آہنگی، باہمی احترام اور مذہبی مکالمے کے فروغ کا مؤثر ذریعہ قرار دیتے ہوئے کہا کہ امام حسینؑ کی سیرت اور پیغامِ کربلا انسانیت کے لیے ایک عالمگیر پیغام ہے، جس کے ذریعے مختلف مذاہب اور مکاتبِ فکر کے درمیان مشترکہ انسانی اقدار کی بنیاد پر قربت، رواداری اور باہمی احترام کو فروغ دیا جا سکتا ہے۔