شہادتِ امام زین العابدینؑ اور عظیم دینی مرجع آیت اللہ العظمیٰ سید محمد سعید حکیمؒ کی برسی کی مناسبت سے مرحوم مرجع کے دفتر میں مجلسِ عزا کا انعقاد کیا گیا جس میں ان کی علمی، دینی اور اخلاقی خدمات کو خراجِ عقیدت پیش کیا گیا

مجلسِ عزا میں حوزۂ علمیہ نجف اشرف کے علماء اور فضلاء کی بڑی تعداد نے شرکت کی

مجلس سے خطاب کرتے ہوئے خطیب نے امام زین العابدینؑ کی پاکیزہ سیرت اور عظیم کردار پر روشنی ڈالتے ہوئے کہا کہ آپؑ نے اپنی دعاؤں، تعلیمات اور تاریخی موقف کے ذریعے پیغامِ کربلا کو زندہ و محفوظ رکھا اور صبر، عبادت اور شعور پر مبنی ایک عظیم مکتب کی بنیاد رکھی۔ انتہائی دشوار حالات میں بھی آپؑ علم، تقویٰ اور معرفت کا روشن مینار بنے رہے

خطیب نے آیت اللہ العظمیٰ سید محمد سعید حکیمؒ کی حیات اور گراں قدر خدمات کا ذکر کرتے ہوئے بالخصوص حق و اصول پر ان کی ثابت قدمی اور دورِ استبداد میں کلمۂ حق کی خاطر برداشت کی جانے والی مشکلات کو اجاگر کیا

انہوں نے کہا کہ مرحوم مرجع نے زہد، عبادت اور خداوندِ متعال سے گہرے تعلق میں مکتبِ امام سجادؑ کی پیروی کی اور اپنی علمی و عملی زندگی کے ذریعے دینی معاشرے کے لیے ایک روشن مثال قائم کی

مقررین نے اس بات پر زور دیا کہ آیت اللہ العظمیٰ سید محمد سعید حکیمؒ کی یاد درحقیقت ایک گہری اور مستحکم فقہی و فکری درسگاہ کی یاد ہے۔ آپؒ نے گراں قدر علمی تصانیف کا ایک عظیم ذخیرہ چھوڑا، جس نے طلابِ علومِ دینیہ کے لیے علم و معرفت کی راہیں روشن کیں، جبکہ آپؒ کا اخلاقی اور علمی طرزِ عمل آج بھی نجف اشرف کے معاشرے اور حوزوی حلقوں میں زندہ و تابندہ ہے

مجلس کے اختتام پر دینی مرجعیت کی بقا و استمرار کے لیے خصوصی دعا کی گئی اور بارگاہِ الٰہی میں التجا کی گئی کہ مرحوم مرجع کو اپنی وسیع رحمت کے سائے میں ان کے اجدادِ طاہرینؑ کے جوار میں جگہ عطا فرمائے اور پیروانِ مکتبِ اہلِ بیتؑ کو ائمۂ اطہارؑ اور علمائے ربانی کے نقشِ قدم پر چلنے کی توفیق عطا فرمائے

واضح رہے کہ آیت اللہ العظمیٰ سید محمد سعید حکیمؒ 25 محرم الحرام 1443ھ کو اس دارِ فانی سے رحلت فرما گئے تھے

آپؒ حوزۂ علمیہ نجف اشرف کی ممتاز علمی شخصیات اور عصرِ حاضر کے نمایاں مراجعِ تقلید میں شمار ہوتے تھے