کربلاء میں روضۂ امام حسین علیہ السلام کے فکری امور کے ذیلی ادارے کے زیر اہتمام صحنِ حسینی میں اعیادِ شعبانیہ کی مناسبت سے ایک خصوصی تقریب منعقد کی گئی

جس میں نابینا افراد نے بھرپور شرکت کی۔ اس روح پرور اجتماع کا مقصد نابینا افراد کو مذہبی اور سماجی سرگرمیوں میں شامل کرنا اور انہیں زیارت و جشنِ ولادت کا موقع فراہم کرنا تھا۔

نور الامام الحسین علیہ السلام انسٹی ٹیوٹ برائے نابینا افراد اور نور الإمام علي علیہ السلام سیکنڈری اسکول کے طلبہ کے لیے اس تقریب کا اہتمام کیا گیا، جس میں شرکاء نے زیارتِ امام حسین علیہ السلام کے شرف کے ساتھ اہل بیت علیہم السلام کی مبارک ولادتوں کی خوشی میں منعقدہ جشن میں شرکت کی۔

تقریب کے موقع پر نابینا افراد کے انسٹی ٹیوٹ کے معاون، جناب احمد راضی حمد نے بتایا کہ روضۂ مبارک کے متولیِ شرعی، جناب شیخ عبدالمہدی الکربلائی کی ہدایات پر نابینا افراد سمیت خصوصی افراد کے لیے مختلف دینی اور سماجی سرگرمیوں کا تسلسل جاری ہے۔ انہوں نے کہا کہ اس تقریب کا مقصد نابینا افراد کو معاشرے کا فعال حصہ بنانا اور انہیں وہی مذہبی و ثقافتی مواقع فراہم کرنا ہے جو دیگر افراد کو حاصل ہوتے ہیں، تاکہ وہ زیارت، دینی اجتماعات اور جشنِ ولادت کی تقاریب میں اپنی شرکت کو یقینی بنا سکیں۔

انہوں نے مزید کہا کہ یہ سرگرمی درحقیقت امام حسین علیہ السلام کے حضور اظہارِ عقیدت اور شکرگزاری کا ایک عملی مظہر ہے، کیونکہ وہی نابینا افراد کے سب سے بڑے حامی اور ان کی امیدوں کا مرکز ہیں۔

صرف کربلاء میں تقریباً 140 نابینا طلبہ زیرِ تعلیم ہیں، جبکہ دیگر عراقی صوبوں میں بھی خصوصی افراد کے لیے سات انسٹی ٹیوٹ قائم کیے جا چکے ہیں، جہاں انہیں تعلیم، تربیت اور مذہبی و ثقافتی سرگرمیوں میں بھرپور شرکت کے مواقع فراہم کیے جاتے ہیں۔