کربلا: حرم امام حسین ع کے سیکرٹری جنرل جناب حسن رشید جواد العبایجی نے کہا ہے کہ عراق کے مقدس روضوں کے سیکرٹری جنرلز کا مشترکہ اجلاس باہمی ہم آہنگی، مشترکہ مؤقف کی تشکیل اور زائرین و عوام کی خدمت کے لیے مؤثر اقدامات کی جانب اہم پیش رفت ہے

انہوں نے کہا کہ عتباتِ عالیات نہ صرف عراق بلکہ پوری اسلامی دنیا میں نمایاں مقام اور اہمیت کے حامل ہیں، کیونکہ یہ دینی، سماجی اور خدماتی شعبوں میں اہم کردار ادا کر رہے ہیں

مقدس روضوں کے سیکرٹری جنرلز کے اجلاس سے خطاب کرتے ہوئے انہوں نے بتایا کہ ان اجلاسوں میں عمومی امور کے علاوہ عتباتِ عالیات کے انتظامی معاملات، زائرین کی خدمت اور عراقی معاشرے کی ضروریات سے متعلق مختلف موضوعات پر تبادلہ خیال کیا جاتا ہے۔ اس دوران مسائل اور انتظامی خامیوں کی نشاندہی کے ساتھ ان کے حل کے لیے مناسب اقدامات پر بھی غور کیا جاتا ہے

جناب حسن رشید جواد العبایجی نے مزید کہا کہ عتباتِ عالیات کو معاشرے کے مختلف طبقات اور قومیتوں میں وسیع اعتماد حاصل ہے، جس کی بدولت وہ سماجی اور قومی مسائل کے حل میں رہنمائی فراہم کرنے اور مثبت کردار ادا کرنے کی صلاحیت رکھتے ہیں

انہوں نے اس بات پر زور دیا کہ ان اجلاسوں کا باقاعدگی سے انعقاد مشترکہ نقطۂ نظر کو فروغ دینے، سفارشات اور تجاویز مرتب کرنے اور انہیں متعلقہ حکام تک پہنچانے میں اہم کردار ادا کرتا ہے۔ اس سے نہ صرف عراقی معاشرے کی خدمت کے عمل کو تقویت ملتی ہے بلکہ اصلاحی اقدامات کو آگے بڑھانے میں بھی مدد ملتی ہے