لبنان میں اعلیٰ دینی مرجع آیت اللہ العظمیٰ سید علی سیستانی کے دفتر نے اسرائیلی جارحیت کے نتیجے میں متاثر ہونے والے یتیم بچوں کی کفالت اور مالی معاونت کا اعلان کیا ہے

اس اقدام کا مقصد جارحیت سے متاثرہ یتیم بچوں کی مشکلات میں کمی لانا اور موجودہ سخت انسانی و معاشی حالات میں انہیں ضروری تعاون فراہم کرنا ہے

اس انسان دوست اقدام کے تحت ایسے یتیم بچوں کو شامل کیا جائے گا جو کسی انجمن، فلاحی ادارے یا دیگر متعلقہ تنظیم کی جانب سے کفالت یا سرپرستی سے محروم ہیں۔ ان بچوں کے لیے ماہانہ مالی امداد مختص کی جائے گی، تاکہ ان کی بنیادی ضروریات پوری کرنے اور مشکل مالی و معاشی حالات سے نمٹنے میں انہیں مدد فراہم کی جا سکے

یہ اقدام یتیموں کی سرپرستی اور ان کی مدد کے حوالے سے اعلیٰ دینی مرجعیت کے مسلسل فلاحی و انسانی مشن کا تسلسل ہے۔ مرجعیت کی سرپرستی میں العين فاؤنڈیشن عراق اور متعدد اسلامی ممالک میں اپنی مختلف شاخوں اور فلاحی پروگراموں کے ذریعے بڑی تعداد میں یتیم بچوں کی کفالت اور دیکھ بھال کر رہی ہے

یہ فلاحی اقدام اس امر کی عکاسی کرتا ہے کہ یتیم بچوں کے حوالے سے مرجعیتِ اعلیٰ کی توجہ کسی جغرافیائی حدود تک محدود نہیں، بلکہ باہمی تعاون، ہمدردی اور اسلامی اخوت کے اصولوں پر قائم ہے

اس کا مقصد مختلف ممالک اور مختلف حالات میں زندگی گزارنے والے مسلم یتیم بچوں کو ایک ہی انسانی اور ہمدردانہ دائرے میں شامل کرتے ہوئے انہیں ضروری مالی معاونت، نگہداشت اور سہارا فراہم کرنا ہے