ترکی کے شہر استنبول میں گیارہویں بین الاقوامی عربی کتاب میلے کی سرگرمیاں جاری ہیں۔ یہ میلہ 15 سے 23 اگست 2026ء تک استنبول کے ینی قاپی کے علاقے میں واقع یوریشیا نمائش و فنون مرکز میں ’’کہانی جاری ہے‘‘ کے عنوان سے منعقد کیا جا رہا ہے

اس بین الاقوامی کتاب میلے میں 30 سے زائد ممالک کے 300 سے زیادہ اشاعتی ادارے شریک ہیں

یہ ثقافتی سرگرمی ناشرین، مصنفین، قارئین اور ثقافتی و علمی اداروں کو ایک پلیٹ فارم پر جمع کرتی ہے اور عرب دنیا سے باہر عربی کتابوں سے متعلق نمایاں ترین ثقافتی سرگرمیوں میں شمار ہوتی ہے

اس میلے کو عرب ناشرین اتحاد کی منظوری حاصل ہے۔ میلے میں عرب، ترک اور بین الاقوامی اشاعتی اداروں کے علاوہ مختلف ممالک کے سرکاری اور ثقافتی وفود بھی شریک ہیں۔ قطر، الجزائر، سلطنتِ عمان، مراکش اور کویت سمیت متعدد ممالک کے وفود اور اداروں کے ساتھ ثقافت، فنون اور سیاست کے شعبوں سے وابستہ شخصیات اور تنظیمیں بھی شرکت کر رہی ہیں

میلے میں قائم اشاعتی اداروں کے اسٹالز پر ادب، فکر، تاریخ، انسانی علوم، اسلامی مطالعات، بچوں کے ادب، زبانوں اور ترجمے سمیت مختلف شعبوں کی کتابیں پیش کی جا رہی ہیں، جبکہ شریک ناشرین کی تازہ ترین مطبوعات بھی نمائش کے لیے رکھی گئی ہیں

استنبول میں اس میلے کا انعقاد اس اعتبار سے بھی خصوصی اہمیت کا حامل ہے کہ یہ شہر عرب دنیا، ترکی اور یورپ کے درمیان ایک اہم ثقافتی پل کی حیثیت رکھتا ہے۔ ترکی میں عرب آبادی کی بڑی تعداد کے علاوہ طلبہ، محققین اور عربی زبان سے دلچسپی رکھنے والے افراد بھی بڑی تعداد میں موجود ہیں۔ اس طرح ناشرین کو مختلف طبقات کے قارئین تک رسائی کا موقع ملتا ہے، جبکہ عرب اور ترک ثقافتی اداروں کے درمیان تعاون کے امکانات بھی مزید مضبوط ہوتے ہیں

میلے کی افتتاحی تقریب کے دوران حکام نے مختلف ثقافتوں کے درمیان رابطے کے لیے استنبول کی اہمیت پر زور دیا ترک ناشرین کی انجمن کے سربراہ نے عربی زبان کو خطے کا ایک اہم ثقافتی ورثہ قرار دیتے ہوئے ترک اور عرب اشاعتی اداروں کے درمیان تعاون کو مزید فروغ دینے کی ضرورت پر زور دیا

کتابوں کے اسٹالز کے ساتھ ساتھ میلے میں ایک بھرپور ثقافتی و فکری پروگرام بھی جاری ہے، جس میں سیمینارز، لیکچرز، فکری نشستیں، شعری محافل، کتابوں کی رونمائی، دستخطی تقریبات اور مختلف فنّی سرگرمیاں شامل ہیں

اس پروگرام میں معروف ادبی، فکری اور علمی شخصیات شریک ہیں، جن میں ناول نگار احمد فال الدین، ادیب ادہم شرقاوی، ناول نگار سعود السنعوسی، مفکر عصام احمد البشیر، ڈاکٹر و مصنف احمد شاکر اور ترک ماہرِ تعلیم یاسین آقطائے سمیت دیگر شخصیات شامل ہیں

ثقافتی پروگرام میں مصنوعی ذہانت کے دور میں کتاب اور مطالعے کا مستقبل، مطالعے اور ترجمے کی اہمیت، اور اقوام کی یادداشت و ثقافت کے تحفظ میں کتاب کے کردار سمیت مختلف موضوعات زیرِ بحث آ رہے ہیں

میلے میں اشاعتی حقوق اور ترجمے کے شعبے کے لیے بھی خصوصی جگہ مختص کی گئی ہے، جہاں ناشرین، مصنفین، ماہرینِ تعلیم، مترجمین اور اشاعتی صنعت سے وابستہ افراد باہمی تعاون، نئے منصوبوں اور حقوقِ دانش سے متعلق امور پر تبادلۂ خیال کر رہے ہیں