عراقی وزارتِ بجلی نے پریس ریلیز کے ذریعے بتایا کہ وزارت توانائی کے ذرائع کو بڑھانے اور قومی بجلی کے نظام کو مضبوط بنانے کے لیے ہمسایہ ممالک کے ساتھ الیکٹرک منصوبوں پر کام جاری رکھے ہوئے ہے

بیان میں کہا گیا کہ بعض رابطہ منصوبے عملی طور پر فعال ہو چکے ہیں، جبکہ دیگر منصوبوں پر فنی اور تعمیری کام طے شدہ شیڈول کے مطابق جاری ہے، جس سے قومی بجلی کے نظام کو اضافی توانائی فراہم کرنے اور خصوصاً زیادہ کھپت کے اوقات میں بجلی کی فراہمی کو بہتر بنانے میں مدد ملے گی

وزارت کے مطابق خلیجی ممالک اور عراق کے درمیان بجلی کے منصوبے پر کام جاری ہے، جس کے ذریعے جنوبی عراق کو تقریباً 500 میگاواٹ بجلی فراہم کی جانی تھی، جو کہ خطے میں حالیہ حالات اور بعض ہنگامی فنی وجوہات کے باعث تاخیر کا شکار ہو گیا ہے

بیان میں مزید کہا گیا کہ عراق اور ایران کے درمیان بجلی کی چاروں رابطہ لائنیں گزشتہ سال سے بند ہیں، جس کی وجہ بروقت ادائیگی نہ ہونا ہے۔ ان لائنوں کی مجموعی پیداواری صلاحیت تقریباً 1200 میگاواٹ ہے۔

اسی طرح عراق اور ترکی کے درمیان "الجزرہ" برقی رابطہ لائن، جو شمالی علاقوں کو تقریباً 600 میگاواٹ بجلی فراہم کرتی تھی، وہ بھی بند ہے

وزارت نے واضح کیا کہ وہ بجلی کے نظام میں رکاوٹوں کو دور کرنے، نئے ٹرانسفارمر اسٹیشن قائم کرنے، موجودہ اسٹیشنوں کی توسیع و بحالی، نئی ترسیلی لائنوں کی تنصیب اور ان کی استعداد بڑھانے کے علاوہ بجلی کے نیٹ ورک کی مسلسل مرمت و بحالی کے منصوبوں پر کام کر رہی ہے تاکہ نظام کو مستحکم بنایا جا سکے اور شہریوں کو بہتر بجلی فراہم کی جا سکے

بیان کے مطابق وزارت نے تمام صوبوں میں بجلی کے نیٹ ورک پر غیر قانونی تجاوزات کے خاتمے کے لیے ایک جامع مہم بھی شروع کی ہے، جس کے نتیجے میں ترسیلی اور تقسیم کار لائنوں پر بوجھ میں نمایاں کمی آئی ہے

وزارت نے انکشاف کیا کہ اس مہم کے دوران بغداد کے مختلف علاقوں میں 4315 میگاواٹ سے زائد بجلی کے غیر قانونی استعمال کو ختم کیا گیا، جبکہ خلاف ورزی کرنے والوں کے خلاف 440 سے زائد قانونی مقدمات بھی درج کیے گئے

وزارت کے مطابق ان اقدامات سے بجلی کے ضیاع میں کمی اور فراہمی کے اوقات میں اضافہ ممکن ہوا ہے۔

شہریوں کی شکایات کے حوالے سے وزارت نے بتایا کہ بجلی کی فراہمی سے متعلق مسائل کے فوری حل کے لیے خصوصی شکایتی لائنیں فعال ہیں، جن کے ذریعے موصول ہونے والی شکایات پر فوری کارروائی کی جاتی ہے تاکہ بجلی کی مسلسل فراہمی کو یقینی بنایا جا سکے اور بندشوں کو کم سے کم رکھا جا سکے

وزارت نے شہریوں سے اپیل کی کہ وہ بجلی کے نیٹ ورک میں خرابیوں یا غیر قانونی تجاوزات کی اطلاع مقررہ شکایتی نمبروں پر دیں، تاکہ مرمتی کاموں میں تیزی لائی جا سکے اور خلاف ورزی کرنے والوں کے خلاف کارروائی ممکن ہو

وزارت کے مطابق بغداد میں بجلی کی شکایات کے لیے ہاٹ لائن (5608) چوبیس گھنٹے فعال ہے، جبکہ (157) کرخ، (158) رصافہ، (1012) صدر سٹی اور (159) بغداد سے باہر دیگر صوبوں کی بجلی سے متعلق شکایات کے لیے مختص کیے گئے ہیں