نجف اشرف: شہادت حضرت فاطمہ زہراءؑ کی مناسبت سے مرجعِ دینی آیت اللہ العظمیٰ حافظ بشیر حسین نجفی دام ظلہ کی زیرِ قیادت مرکزی جلوسِ عزا برآمد ہوا، جس میں علمائے کرام، حوزہ علمیہ نجف اشرف کے اساتذہ و طلبہ، عراقی قبائل کے سربراہان اور بڑی تعداد میں مؤمنین نے شرکت کی

جلوس کے شرکاء نے حرم امیرالمؤمنین حضرت علی ع میں حاضری دے کر آپؑ کی خدمت میں تعزیت و پرسہ پیش کیا

مرکزی جلوسِ عزا اتوار کے روز آیت اللہ العظمیٰ حافظ بشیر حسین نجفی دام ظلہ کے مرکزی دفتر سے برآمد ہوا، جو مقامِ صافی صفا سے گزرتا ہوا حرم امیرالمؤمنین حضرت علی علیہ السلام پہنچ کر اختتام پذیر ہوا

اس موقع پر شرکاء نے لبیک یا زہراءؑ، عظّم اللہ لک الأجر یا امیرالمؤمنینؑ اور عظّم اللہ لک الأجر یا صاحب الزمانؑ کے نعرے بلند کیے اور نوحہ خوانی کرتے ہوئے حرم امیرالمؤمنین علیہ السلام تک پہنچے، جہاں مجلسِ عزا منعقد ہوئی۔ مجلس میں حجۃ الاسلام والمسلمین شیخ جعفر الدجیلی نے حضرت فاطمہ زہراء علیہا السلام کے مصائب بیان کیے

مرکزی دفتر کے مدیر حجۃ الاسلام والمسلمین شیخ علی نجفی نے صحافیوں سے گفتگو کرتے ہوئے کہا کہ مرجعِ دینی کی مؤمنین کے ہمراہ جلوسِ عزا میں شرکت کا مقصد حضرت امیرالمؤمنین ع اور حضرت امام زمانہ عجل اللہ تعالیٰ فرجہ الشریف کی خدمت میں تعزیت و پرسہ پیش کرنے کے ساتھ اس عظیم مصیبت کی اہمیت کو اجاگر کرنا ہے، جس کے نتیجے میں حضرت فاطمہ زہراء علیہا السلام کی شہادت ہوئی

انہوں نے کہا کہ ایامِ فاطمیہ کی عظمت و اہمیت کو اجاگر کرنا اور ان ایام کی یاد کو زندہ رکھنا شعائرِ الٰہیہ کی تعظیم کے مترادف ہے۔ ان ایام میں جلوسوں، مجالسِ عزا اور ماتم داری کا اہتمام کرنا ہم سب کی ذمہ داری ہے

شیخ علی نجفی نے مرکزی جلوسِ عزا میں شرکت کرنے والے تمام مؤمنین، بالخصوص عراق کے مختلف دور دراز علاقوں سے آنے والے عزاداروں کا شکریہ ادا کیا اور ان کی شرکت کو حضرت فاطمہ زہراء علیہا السلام سے عقیدت و محبت اور اہلِ بیت علیہم السلام کے ساتھ وفاداری کا مظہر قرار دیا

انہوں نے مزید کہا کہ ان شاء اللہ، ہر سال اس جلوس کو مزید بہتر اور مؤثر انداز میں منعقد کیا جائے گا، تاکہ حضرت فاطمہ زہراء علیہا السلام کی مظلومیت، ان کی عظیم قربانی اور شہادت کی حقیقت و معنویت پوری دنیا کے سامنے آشکار ہو اور روزِ قیامت ہمیں حضرت زہراء سلام اللہ علیہا کی شفاعت نصیب ہو