پاکستان کا سب سے بڑا مرکزی جلوسِ اربعین آج کراچی میں حضرت امام حسینؑ اور شہدائے کربلا کی عظیم قربانی کی یاد میں نہایت عقیدت، احترام اور مذہبی جوش و جذبے کے ساتھ برآمد ہوا۔

پاکستان کا سب سے بڑا مرکزی جلوسِ اربعین آج کراچی میں حضرت امام حسینؑ اور شہدائے کربلا کی عظیم قربانی کی یاد میں نہایت عقیدت، احترام اور مذہبی جوش و جذبے کے ساتھ برآمد ہوا۔ ہزاروں عزاداروں نے جلوس میں شرکت کر کے نواسۂ رسول حضرت امام حسینؑ اور ان کے وفادار ساتھیوں کو پُرخلوص خراجِ عقیدت پیش کیا۔

مرکزی جلوس نشتر پارک سے برآمد ہوا اور اپنے مقررہ راستوں سے گزرتا ہوا حسینیہ ایرانیاں، کھارادر پر اختتام پذیر ہوا۔ جلوس کے دوران عزاداروں نے نوحہ خوانی، سینہ زنی اور ماتم داری کے ذریعے شہدائے کربلا کی عظیم قربانیوں کو یاد کیا۔ راستے بھر میں عزاداروں کی خدمت کے لیے متعدد سبیلیں، نیاز اور خدمتِ زائرین کے موکب قائم کیے گئے تھے، جہاں شرکائے جلوس کو مختلف سہولیات فراہم کی گئیں۔

جلوس کے پرامن انعقاد کو یقینی بنانے کے لیے سکیورٹی کے غیر معمولی انتظامات کیے گئے تھے۔ پولیس، رینجرز اور دیگر قانون نافذ کرنے والے اداروں کے اہلکار جلوس کے تمام راستوں پر تعینات رہے، جبکہ نگرانی، چیکنگ اور ٹریفک کی روانی برقرار رکھنے کے لیے خصوصی اقدامات کیے گئے، تاکہ عزادار اپنے مذہبی فرائض پُرامن اور محفوظ ماحول میں ادا کر سکیں۔