حرمِ امام حسینؑ کے شعبۂ امورِ فکری و ثقافتی کے ایک اعلیٰ سطحی وفد نے اسلامی جمہوریہ ایران کا دورہ کیا

یہ دورہ حرمِ حسینی کے متولیِ شرعی، جناب شیخ عبد المہدی کربلائی کی ہدایت پر انجام پایا، جس کا مقصد علمی، فکری، ثقافتی اور دینی اداروں کے ساتھ تعاون کو فروغ دینا اور اسلامی ثقافت و علومِ اہلِ بیتؑ کی خدمت کے لیے مشترکہ منصوبوں پر تبادلۂ خیال کرنا تھا۔

شعبۂ امورِ فکری و ثقافتی کے سربراہ، شیخ علی القرعاوی نے بتایا کہ یہ دورہ حرمِ مقدس کی اُن مسلسل کوششوں کا حصہ ہے، جن کے ذریعے فکری، ثقافتی اور دینی تعاون کے دائرۂ کار کو مزید وسعت دی جا رہی ہے، تاکہ ایسی علمی شراکتیں قائم کی جا سکیں جو اصیل اسلامی ثقافت کے فروغ اور علومِ اہلِ بیتؑ کی نشر و اشاعت میں مؤثر کردار ادا کریں

انہوں نے مزید بتایا کہ وفد نے اسلامی جمہوریہ ایران میں مرجعِ دینیِ اعلیٰ کے نمائندے، سماحۃ السید جواد الشہرستانی سے ملاقات کی، جبکہ متعدد علمی و ثقافتی اداروں کا بھی دورہ کیا، جن میں مؤسسۃ الدلیل، مؤسسۃ الخلق العظیم، اور مؤسسۃ وارث الأنبیاء للنہضۃ الحسینیۃ شامل ہیں

ان ملاقاتوں کے دوران مختلف علمی، فکری اور ثقافتی موضوعات پر تفصیلی تبادلۂ خیال کیا گیا، جبکہ مشترکہ ثقافتی، علمی اور میڈیا پروگرامز کے حوالے سے بھی گفتگو ہوئی، جن کا مقصد دونوں جانب علمی و ابلاغی تعاون کو مزید مستحکم بنانا ہے

شیخ علی القرعاوی نے مزید کہا کہ وفد کو مرقدِ شاہ عبد العظیم الحسنیؒ کی زیارت کا شرف بھی حاصل ہوا، جہاں سماحۃ السید علی قاضی عسکر سے ملاقات ہوئی۔ اس موقع پر شعبۂ امورِ فکری و ثقافتی اور اس کے ذیلی مراکز کی متعدد علمی و فکری مطبوعات بطورِ تحفہ پیش کی گئیں، جبکہ مشترکہ دینی تقریبات اور ثقافتی سرگرمیوں کے انعقاد پر بھی اتفاق کیا گیا

انہوں نے بتایا کہ وفد نے مقدس شہر قم میں جامعۃ الحدیث والعلوم الدینیۃ کا بھی دورہ کیا، جہاں اس بات پر اتفاق ہوا کہ “موسوعۂ اہلِ بیتؑ” کا ترجمہ حرمِ حسینی کے شعبۂ امورِ فکری و ثقافتی کی نگرانی میں انجام دیا جائے گا، تاکہ علوم و معارفِ اہلِ بیتؑ کو وسیع پیمانے پر عام کیا جا سکے اور اصیل اسلامی ثقافت کے مفاہیم کو مزید مستحکم بنایا جا سکے