حرمِ امام حسینؑ نے آج بروز جمعرات مرجعِ دینیِ اعلیٰ کی اپیل پر لبیک کہتے ہوئے انسانی ہمدردی کی بنیاد پر ایک وسیع چندہ مہم کا آغاز کیا، جس کا مقصد ایران اور لبنان کے عوام کو موجودہ مشکل حالات میں سہارا فراہم کرنا ہے

ہمارے نمائندے کے مطابق یہ مہم حرمِ امام حسینؑ میں متولیِ شرعی شیخ عبدالمہدی کربلائی کی زیرِ سرپرستی شروع کی گئی، جس میں مختلف شعبہ جات کے ذمہ داران نے بھرپور شرکت کی اس اقدام کا بنیادی مقصد بحرانی حالات میں انسانیت کی خدمت کرنا ہے، جو کہ امام حسینؑ کی تعلیمات کا نمایاں پیغام ہے

مزید برآں، نمائندۂ مرجعیت نے مسلمانوں کے درمیان باہمی تعاون اور یکجہتی کی اہمیت پر زور دیتے ہوئے مؤمنین سے اپیل کی کہ وہ اپنی استطاعت کے مطابق اس مہم میں حصہ لیں، خواہ مالی عطیات کی صورت میں یا امدادی اشیاء کے ذریعے

انہوں نے واضح کیا کہ یہ مہم عراق کے مقدس روضوں کی جانب سے جاری انسانی و فلاحی سرگرمیوں کے تسلسل کا حصہ ہے، جس کا مقصد اسلامی معاشروں میں تعاون، ہمدردی اور بھائی چارے کے جذبے کو فروغ دینا ہے۔

دوسری جانب، حرمِ حسینیؑ نے اپنے ایک بیان میں، جو کربلا ٹوڈے نیوز ایجنسی کو موصول ہوا، بتایا کہ عطیات کو قابلِ اعتماد ذرائع کے ذریعے لبنان اور ایران میں مستحق افراد تک پہنچایا جائے گا۔ ساتھ ہی یہ عزم بھی ظاہر کیا گیا کہ مستقبل میں بھی ضرورت مند اقوام کی مدد کے لیے اسی نوعیت کی مہمات جاری رکھی جائیں گی

واضح رہے کہ اس انسانی بحران سے نمٹنے کے لیے مرجعِ دینیِ اعلیٰ نجفِ اشرف کی جانب سے حقوقِ شرعیہ کے استعمال کی بھی اجازت دی جا چکی ہے