یہ تاریخی رپورٹ امام حسین علیہ السلام کے مقدس حرم کی تعمیر، ترقی، اور اس کو پیش آنے والی تخریب و تباہی کے مراحل کا جائزہ پیش کرتی ہے۔ اس سلسلے میں مؤرخ رشید سعید زمیزم، جو کہ عتبة حسینیہ مقدسة کے میوزیم کے معاون سربراہ ہیں، ہمیں ان تفصیلات سے آگاہ کرتے ہیں

حرم مطہرکی پہلی تعمیر

امام حسین علیہ السلام کی شہادت 10 محرم 61 ہجری بمطابق 680 عیسوی کو ہوئی۔ اس کے بعد سے ان کے مزار مقدس کی تعمیر، ترقی، اور تخریب کے کئی مراحل گزرے۔ پہلی بار حرم کی تعمیر 66 ہجری میں مختار ثقفی کے حکم سے ہوئی، لیکن دو سال بعد شدید بارشوں کے باعث یہ بنا گر گئی۔ پھر محمد بن ابراہیم بن مالک اشتر نے اس کی دوبارہ تعمیر کی، جو کہ عباسی خلافت کے قیام 132 ھ تک قائم رہی۔

عباسی دور میں حرم امام حسین علیہ السلام

عباسی دور کے آغاز میں بعض خلفاء، جیسے ابو العباس سفاح، نے مزار کی تعمیر و ترقی میں حصہ لیا۔ تاہم، بعد میں منصور عباسی کے دور میں علویوں کے انقلابات کے باعث اھل البیت علیہم السلام کے خلاف انتقامی پالیسی اپنائی گئی، جس میں حرم کی تخریب بھی شامل تھی۔ اس کے باوجود، ابو جعفر منصور کی زوجہ، جو آلِ بیت علیہم السلام سے تھیں، نے خفیہ طور پر حرم کی تعمیر کے لیے مالی امداد فراہم کی اور علی بن ابی داود کو پہلا سادن مقرر کیا۔

تخریب اور تباہی کے مراحل

حرم ہارون الرشید کے دور تک قائم رہا، جس نے اس کی تخریب اور زیارت پر پابندی عائد کی۔ اس کے بعد اس کے بیٹے امین نے کچھ اصلاحات کیں، اور پھر مامون نے سیاسی وجوہات کی بنا پر حرم کی دوبارہ تعمیر کی۔

بعد میں، متوکل عباسی نے اھل البیت علیہم السلام سے شدید دشمنی کے باعث حرم کو چار بار منہدم کیا، زائرین پر بھاری ٹیکس عائد کیے، اور بعض کے ہاتھ کاٹ دیے۔ متوکل نے قبر کو غرق کرنے کے لیے پانی چھوڑنے کا حکم دیا، لیکن پانی قبر کے ارد گرد رک گیا اور اسے نقصان نہیں پہنچا، جس سے "الحائر" کی اصطلاح وجود میں آئی۔

متوکل کے قتل کے بعد تعمیر نو

متوکل کو اس کے بیٹے نے قتل کیا، جو اھل البیت علیہم السلام سے محبت رکھتا تھا۔ اس نے کربلا آ کر مزار کی تعمیر کے لیے مالی امداد فراہم کی اور زائرین کی رہنمائی کے لیے ایک بلند مینار تعمیر کیا۔ فاطمی دور میں، 369 ہجری میں، مزار کی شاندار تعمیر ہوئی اور اس کے گرد حفاظتی دیوار بنائی گئی اور کچھ نگہبان بھی مقرر کیے گئے۔

بعد کے ادوار میں حرم امام حسین علیہ السلام

469 ہجری میں، حرم کو ڈاکوؤں نے نقصان پہنچایا، لیکن حلہ میں مزیدی حکومت کے ایک امیر نے اس کی دوبارہ تعمیر کی۔ پانچویں صدی ہجری میں، زیارت کے موسم میں ایک آگ کے باعث قبة گر گیا، جسے محبین امام حسین علیہ السلام نے دوبارہ تعمیر کیا۔ آٹھویں صدی ہجری میں، سلطان احمد الجلائری کے حکم سے 765 ہجری میں حرم کی دوبارہ تعمیر ہوئی اور دو عظیم مینار بنائے گئے۔

بیرونی عطیات اور حرم کی ترقی

888 ہجری میں حرم کو دوبارہ نقصان پہنچا، لیکن ہندوستان، کشمیر، اور پاکستان کے محبین اہل البیت علیہم السلام کے عطیات سے اس کی تعمیر نو ہوئی۔ عثمانی دور میں، حرم کو متعدد بار نقصان پہنچا، خاص طور پر داوود پاشا (1825)، نجيب پاشا (1842)، حمزة بك (1915) کے ہاتھوں، اور برطانوی افواج کے کربلا پر بمباری کے دوران۔

جدید دور میں حرم امام حسین علیہ السلام

بار بار کے نقصانات کے باوجود، محبین امام حسین علیہ السلام نے مرمت کے کام جاری رکھے، یہاں تک کہ 1961 کی عوامی بغاوت میں صدامی نظام کے ہاتھوں حرم کو شدید نقصان پہنچا۔

عثمانی دور اور اس کے بعد کے ادوار میں، حرم حسینی کے دروازوں کی تعداد چار سے بڑھا کر دس کر دی گئی۔ ہر سمت کے لیے ایک مخصوص دروازہ بنایا گیا، جیسے "باب الماء" (پانی کا دروازہ) جو پہلی یا دوسری صدی ہجری میں کھولا گیا تھا۔

حرم میں دینی مدارس، کتابوں کی خریداری کے لیے بازار، علما کی مجالس، دروس اور دینی لیکچرز بھی شامل تھے۔

نظام کے زوال کے بعد حرم کی ترقی

نظام کے سقوط کے بعد، دینی مرجعیت نے حرم کی انتظامیہ اور ترقی کی ذمہ داری سنبھالی۔ نئے دروازے کھولے گئے، جن کی تعداد دس ہو گئی۔ اہم دروازوں میں "باب السلطانیہ" شامل ہے، جو 1309 ہجری میں سلطان عبدالمجید پاشا کے حکم سے کھولا گیا، اور یہ سیدہ زینب (علیہا السلام) کے مقام اور مدرسہ زینبیہ کی طرف منسوب ہے۔ اسی طرح "باب القبلة" 1878 عیسوی میں "باب الرجاء" کی سمت کھولا گیا، جو زائرین کی نماز اور برکت طلب کرنے کی جگہ تھی۔

 "باب الکرامة" بیسویں صدی کے ساٹھ کی دہائی میں ایک نابینا شخص کے امام حسین (علیہ السلام) کی برکت سے شفایاب ہونے کے بعد کھولا گیا۔ "باب السلام" کا نام اس لیے رکھا گیا کیونکہ زائرین اس کے سامنے کھڑے ہو کر امام مہدی (عجل اللہ فرجہ) یا امیر المؤمنین (علیہ السلام) کو سلام پیش کرتے تھے۔ "باب السدرة" کا نام اس درخت کے حوالے سے ہے جسے متوکل نے کاٹا تھا، جو قبر شریف پر سایہ

فگن تھا۔ "باب الرأس الشريف" کو پہلے "باب الحر" کے نام سے جانا جاتا تھا کیونکہ یہ "الحرة" کے علاقے کی طرف رخ ہے۔

گھڑی کی تنصیب

1309 ہجری میں، ناصرالدین شاہ قاجاری کے حکم سے "باب القبلة" پر پہلی گھڑی نصب کی گئی، جو 1900 عیسوی تک کام کرتی رہی۔ بعد میں یہ گھڑی خراب ہو گئی اور 1387 ہجری میں اس کی مرمت کی گئی۔ 1991 عیسوی میں انتفاضہ کے دوران بمباری میں یہ گھڑی دوبارہ متاثر ہوئی۔ بعد میں، اعلیٰ مرجعیت نے اسے دوبارہ تعمیر کیا، اور آج اس کی آواز حرم حسینی کے تمام حصوں میں گونجتی ہے