عراق کی وزیر مواصلات، محترمہ ہیام الیاسری نے ہفتے کے روز سال 2025 کے لیے اپنی وزارت کی ترجیحات کا اعلان کیا، جن میں ففتھ جنریشن (5G) ٹیکنالوجی کا نفاذ سرفہرست ہے

انہوں نے واضح کیا کہ مشہور سوشل میڈیا ایپلی کیشن "ٹک ٹاک" پر پابندی کا فیصلہ عراقی پارلیمنٹ کی منظوری سے مشروط ہے

وزیر موصوفہ نے کہا کہ سال 2025 میں ہماری اولین ترجیحات میں 5G ٹیکنالوجی کے لیے قومی لائسنس کا اجرا، فائبر آپٹک کیبل کے نیٹ ورک کو وسعت دینا، اور اسے زیادہ سے زیادہ صارفین تک پہنچانا شامل ہے، تاکہ انٹرنیٹ سروس میں بہتری لائی جا سکے اور مرحلہ وار وائی فائی پر انحصار ختم کیا جا سکے۔

انہوں نے مزید کہا کہ ہم ٹرانزٹ منصوبوں اور فائبر آپٹک کی توسیع پر بھرپور کام کر رہے ہیں، جس کے باعث بین الاقوامی کمپنیاں عراق میں سرمایہ کاری میں دلچسپی لے رہی ہیں۔

ہیام الیاسری نے بتایا کہ "ہم نے ٹک ٹاک ایپ پر پابندی کے لیے پہلے ہی ایک باضابطہ درخواست پیش کر دی ہے۔ ہمیں ہزاروں عراقی خاندانوں کی جانب سے مطالبات موصول ہوئے ہیں جنہوں نے ایپ کو بند کرنے پر زور دیا ہے، کیونکہ اس میں کئی ایسے مناظر اور مواد شامل ہیں جو ہماری قومی اقدار اور معاشرتی روایات کے منافی ہیں۔

انہوں نے زور دیتے ہوئے کہا کہ یہ فیصلہ صرف وزارت کا اختیار نہیں، ہم نے اپنا موقف اور درخواست پیش کر دی ہے، تاہم ابھی تک پارلیمنٹ کی جانب سے کوئی واضح ردعمل سامنے نہیں آیا۔ ہمیں امید ہے کہ پارلیمنٹ اس حوالے سے جلد فیصلہ کرے گی، اور ہم اس پر مکمل عملدرآمد کریں گے۔