روضۂ امام حسینؑ کے سیکرٹری جنرل نے کہا کہ عظیم الشان اور پُرامن اربعین واک امام عالی مقام کے ابدی فیض اور عطا کے تسلسل کی واضح دلیل ہے

روضہ حسینی کے سیکرٹری جنرل جناب حسن رشید العبايجی نے اصحابِ مواکب، رضاکاروں، مقدس روضوں کے منتسبین اور سرکاری اداروں کی جانب سے دنیا بھر سے آنے والے زائرین کے لیے بہترین انتظامات اور پُرامن زیارت کی فراہمی کے لیے کی جانے والی تمام کاوشوں کو عتبہ حسینی کی جانب سے قدر کی نگاہ سے دیکھنے کا اظہار کیا

انہوں نے کہا کہ یہ قربانیاں اور پیش کردہ خدمات محض جسمانی حاضری نہیں، بلکہ امام حسینؑ کی قربانیوں کا ایک جیتا جاگتا عملی نمونہ ہیں۔ امام عالی مقامؑ کی پُرسوز اور گونج دار آواز ہر زمان و مقام میں جابروں اور ظالموں کے تخت و تاج کو ہلا دیتی ہے، اور زیارتِ اربعین اس روحانیت اور ابدی پیغام کا عملی مظہر ہے

اپنی تقریر میں انہوں نے کہا اے مومنین، محبان اور موالینِ اہلِ بیتؑ! امام حسینؑ، ان کے اہلِ بیتؑ اور اصحابؓ کی شہادت پر اللہ تعالیٰ ہمارے اور آپ کے اجر کو عظیم فرمائے، اور آپ کی زیارت و اعمال کو اپنی بارگاہ میں قبول فرمائے۔ یہ صرف جسمانی شرکت نہیں، بلکہ امام حسینؑ کی قربانیوں کا عملی اظہار اور ان کی صدا پر لبیک کہنا ہے

انہوں نے کہا کہ زیارتِ اربعین وفا، عہد اور امام حسینؑ کی راہ سے وابستگی کی جیتی جاگتی تصویر ہے۔ یہ تمام فضیلتیں امام حسینؑ کے موقف اور قربانیوں پر فخر کا باعث ہیں، اور ان کی آواز ہر زمان و مکان میں جابروں کے ایوانوں کو ہلا دیتی ہے

سیکرٹری جنرل نے زیارتِ اربعین کے دوران دعا اور شفاعت کے پہلو کو اجاگر کرتے ہوئے امام جعفر صادقؑ کی دعا پیش کی اے اللہ! اے وہ ذات جس نے ہمیں عزت بخشی اور شفاعت کا وعدہ دیا، میرے، میرے بھائیوں اور امام حسینؑ کے ان زائرین کو بخش دے جنہوں نے اپنے مال خرچ کیے، جسمانی مشقتیں برداشت کیں، ہماری محبت اور تیرے انعام کی امید میں اس پاک سفر پر نکلے، تیرے نبیؐ کو خوش کرنے کے لیے آئے۔ ان کی دعا قبول فرما، اور ہر سرکش جابر اور انسان و جن کے شیطانوں کے شر سے ان کی حفاظت فرما

انہوں نے کہا سلام اور تحسین ان تمام شعبہ جات اور ٹیموں پر، جنہوں نے اپنی انسانی، مادی اور معنوی صلاحیتیں وقف کر دیں، اور دنیا کو یہ پیغام دیا کہ وہ وفادار سپاہی ہیں۔ انہوں نے زائرین کی خدمت، حفاظت اور طبی، لوجسٹک، رہائش، پانی، کھانا، نقل و حمل اور امن و امان کی فراہمی میں اعلیٰ معیار کی قربانی، اخلاق اور نظم و ضبط کا عملی مظاہرہ کیا

انہوں نے مجالسِ عزاء اور خدماتی مواکب، مرد و خواتین رضاکاروں اور ان سرکاری اداروں کو بھی خراجِ تحسین پیش کیا جنہوں نے زیارت کے کامیاب انعقاد میں حصہ لیا، اور مرجعیتِ اعلیٰ کی ہدایات پر عمل کرتے ہوئے زیارت کو حسینیت کے شایانِ شان انداز میں پیش کیا

سیکرٹری جنرل نے مقامی حکومتوں، وزارتوں اور سیکیورٹی اداروں کی حمایت اور تعاون پر گہرا شکریہ ادا کیا اور کہا محبت اور احترام کا سلام وزیرِاعظم کے دفتر، شریک وزارتوں، بالخصوص سیکیورٹی اداروں اور الحشد الشعبی کو، جنہوں نے شمال سے جنوب تک زیارت کے دوران امن قائم رکھنے اور حالات کو کنٹرول میں رکھنے میں خصوصی دلچسپی لی، نیز صحت، بلدیات اور ٹرانسپورٹ کی سہولیات فراہم کیں تاکہ زائرین بحفاظت اپنے مقامات تک پہنچ سکیں

انہوں نے کربلا کے گورنر، ان کی ٹیم اور صوبائی کونسل کے اراکین کے کردار کو بھی سراہا، جنہوں نے زیارت کو محفوظ اور آسان بنانے کے لیے بھرپور محنت کی، اور بلدیات کی جانب سے میدان میں خدمات کی منظم فراہمی کو قابلِ تعریف قرار دیا

سیکرٹری جنرل نے میڈیا اور سوشل میڈیا کے کردار کو بھی خراجِ تحسین پیش کیا، جنہوں نے زیارت کی سرگرمیوں کو دیانتداری اور حقیقت پسندی کے ساتھ دنیا تک پہنچایا۔ انہوں نے کہا سلام اور تحسین میڈیا، ٹی وی چینلز اور سوشل میڈیا پلیٹ فارمز کو، جنہوں نے اس ملین مارچ کو محبتِ اہلِ بیتؑ سے سرشار ہو کر سچے اور بامعنی الفاظ میں دنیا کے سامنے پیش کیا

انہوں نے کہا کہ یہ میڈیا کوریج زیارت کو مقامی اور عالمی سطح پر اجاگر کرنے کا باعث بنی، اور زائرین کے لیے مثالی انتظام اور انسانی خدمت کی شاندار تصویر دنیا کے سامنے پیش کی