اسلام آباد: ہفتۂ صادقین علیہما السلام کی بین الاقوامی تقریبات کے سلسلے میں حرم امیرالمؤمنین علیہ السلام کے وفد نے معروف دینی ادارے جامعۃ الکوثر اسلام آباد کا دورہ کیا اور طلبہ سے خطاب کیا

حرم امیرالمؤمنین علیہ السلام کے وفد کے سربراہ اور شعبۂ امور دینیہ کے سربراہ شیخ کرار الخفاجی دامت توفیقاتہ نے کہا کہ پاکستان کے دورے کے دوران وفد کو مؤمنین سے ملاقات اور ہفتۂ صادقین علیہما السلام کی مختلف تقریبات میں شرکت کا موقع ملا

 انہوں نے پاکستانی عوام کی جانب سے وفد کے پرتپاک استقبال، محبت، مہمان نوازی اور حسنِ میزبانی پر خوشی اور اطمینان کا اظہار کیا

اسلام آباد کے دورے کے دوران حرم امیرالمؤمنین علیہ السلام کے وفد نے جامعۃ الکوثر کا بھی دورہ کیا۔ وفد نے سب سے پہلے آیت اللہ شیخ محسن علی نجفی قدس سرہٗ کے مرقد پر فاتحہ خوانی کی، جس کے بعد جامعہ کے مختلف شعبہ جات کا دورہ کیا، طلبہ سے ملاقات کی اور ان سے خطاب کیا

شیخ کرار الخفاجی نے طلبہ کو جوانی اور حصولِ علم کے اس قیمتی موقع کو غنیمت سمجھنے، اپنی تعلیم کے سلسلے میں بھرپور محنت کرنے، علمی میدان میں نمایاں مقام حاصل کرنے اور اس اہم مرحلے سے بھرپور استفادہ کرتے ہوئے اپنے علمی و تبلیغی مستقبل کی تعمیر کرنے کی تلقین کی

جامعۃ الکوثر کی جانب سے حرم امیرالمؤمنین علیہ السلام کے معزز وفد کی تشریف آوری پر شکریہ ادا کرتے ہوئے کہا گیا کہ آپ حضرات کی آمد سے جامعۃ الکوثر کی فضا میں ساقیِ کوثر امیرالمؤمنین علیہ السلام کی محبت و ولایت کی خوشبو مزید مہک اٹھی

حرم امیرالمؤمنین علیہ السلام کا وفد پاکستان کے مختلف شہروں میں اپنا دورہ جاری رکھے ہوئے ہے، جہاں وہ اسلام آباد اور لاہور سمیت مختلف مقامات پر ہفتۂ صادقین علیہما السلام کی تقریبات میں شرکت، دینی و ثقافتی اداروں سے ملاقات اور پاکستان کے مؤمنین و علمی و دینی اداروں کے ساتھ روابط و تعاون کو مزید مضبوط بنانے کے لیے مختلف سرگرمیوں میں مصروف ہے