عراق کے علاقے کردستان کے شہر اربیل میں حرم امام حسینؑ کے زیرِ اہتمام رسولِ اکرم حضرت محمد مصطفیٰ صلی اللہ علیہ وآلہ وسلم کی ولادتِ باسعادت کی مناسبت سے جشنِ میلاد کا انعقاد کیا گیا، جس میں کردستان میں حرم امام حسین علیہ السلام کے نمائندے شیخ علی القرعاوی سمیت مختلف شعبہ ہائے زندگی سے تعلق رکھنے والی شخصیات اور متعدد مذہبی و مسلکی برادریوں کے نمائندوں نے شرکت کی

تقریب کا آغاز حرم امام حسینؑ کے دارالقرآن کے قرّاء کی تلاوتِ قرآنِ کریم سے ہوا، جس کے بعد شیخ علاء السعیدی نے رسولِ اکرم صلی اللہ علیہ وآلہ وسلم کی سیرتِ طیبہ اور محبت و باہمی رواداری کے فروغ میں آپ کی تعلیمات کے کردار پر خطاب کیا

تقریب میں نعتِ رسولِ مقبول بھی پیش کی گئی، جبکہ اختتام پر شرکاء میں مٹھائیاں اور کیک تقسیم کیے گئے

جشن میں مختلف مذاہب اور مسالک سے تعلق رکھنے والے افراد کی شرکت نے باہمی اتحاد، رابطے اور مذہبی رواداری کے فروغ کے لیے ایک خوبصورت موقع فراہم کیا

کردستان میں حرم امام حسینؑ کے نمائندے شیخ علی القرعاوی نے کربلا ٹوڈے نیوز ایجنسی سے گفتگو کرتے ہوئے کہا کہ حرم امام حسینؑ کردستان میں اپنی دینی و ثقافتی سرگرمیوں اور موجودگی کو وسعت دے رہا ہے، جسے حرم کی اعلیٰ انتظامیہ کی مسلسل حمایت حاصل ہے

انہوں نے بتایا کہ اربیل شہر میں حرم امام حسینؑ کی سرگرمیاں بہتر انداز میں جاری ہیں، جبکہ کردستان کی وزارتِ اوقاف و مذہبی امور کے ساتھ تعاون نے دینی پروگراموں اور تقریبات کے انعقاد کے ساتھ ساتھ علاقے کی مذہبی شخصیات اور اداروں سے روابط کے فروغ میں بھی اہم کردار ادا کیا ہے

شیخ علی القرعاوی نے مزید کہا کہ یہ سرگرمیاں حرم امام حسینؑ کے دینی و ثقافتی پروگراموں کو وسعت دینے اور کردستان کے مختلف مذہبی و سماجی طبقات کے درمیان رابطے، باہمی ہم آہنگی اور رواداری کے فروغ کی کوششوں کا حصہ ہیں