حرمِ امام علیؑ نے ایامِ زیارت کے دوران زائرین کی سکیورٹی اور بہترین خدمات انجام دینے والے صوبہ بصرہ کے دوسرے پولیس کالج کے جوانوں کے اعزاز میں تقریب کا انعقاد کیا

پولیس کالج کے جوانوں نے زیارتِ اربعین امام حسینؑ اور رسولِ اکرم حضرت محمد صلی اللہ علیہ وآلہ وسلم کی شہادت کی مناسبت سے ہونے والی زیارتوں کے دوران زائرین کی سکیورٹی کو یقینی بنانے اور آمدورفت کو منظم رکھنے میں اہم کردار ادا کیا

تقریب صحنِ سیدہ فاطمہؑ کے آمنہ ہال میں منعقد ہوئی، جس میں حرمِ امام علیؑ کے سیکریٹری جنرل سید عیسیٰ الخَرسان، شعبۂ حفظِ نظام، تعلقاتِ عامہ اور میڈیا کے متعدد سربراہان سمیت دیگر ذمہ داران نے شرکت کی

سید عیسیٰ الخَرسان نے تقریب سے خطاب کرتے ہوئے پولیس کالج کے جوانوں کا خیرمقدم کیا اور زیارتوں کے دوران ان کی بہترین سکیورٹی خدمات کو سراہا۔ انہوں نے کہا کہ قرآنِ کریم کی آیات اور احادیثِ مبارکہ میں انسان کو اپنے وقت اور عمر کی قدر کرنے اور اسے اللہ تعالیٰ کی راہ اور دوسروں کی خدمت میں صرف کرنے کی تاکید کی گئی ہے

انہوں نے مزید کہا کہ ان بابرکت مواقع پر زائرین اور سوگواروں کی خدمت میں حصہ لینے کا موقع طلبہ کے لیے دنیا و آخرت میں نیک اثرات کا باعث بنے گا، جبکہ مقدس مقامات پر زائرین کی خدمت اللہ تعالیٰ کے نزدیک عظیم مقام رکھتی ہے اور اہلِ ایمان و زائرین کی مخلصانہ دعائیں اس خدمت کا قیمتی ثمر ہیں

حرمِ امام علیؑ کے سیکریٹری جنرل نے افسران، اہلکاروں اور طلبہ کی خدمات کو سراہتے ہوئے ان کی جانب سے تفویض کردہ ذمہ داریوں کو اخلاص اور ذمہ داری کے ساتھ انجام دینے پر خراجِ تحسین پیش کیا

اس موقع پر دوسرے پولیس کالج کے کمانڈنٹ میجر جنرل صلاح سلمان الشمری نے بھی حرمِ امام علیؑ کی جانب سے کیے گئے اس اقدام کو سراہا انہوں نے کہا کہ حرمِ امام علیؑ ماضی کی طرح آج بھی سکیورٹی اداروں کی بھرپور حمایت اور ان کے ساتھ اعلیٰ سطحی رابطہ کاری جاری رکھے ہوئے ہے

انہوں نے کہا کہ زائرین کی خدمت اور زیارتوں کو محفوظ بنانے کے لیے سکیورٹی فورسز کی جانب سے انجام دی جانے والی خدمات کے اعتراف میں یہ جوان اس اعزاز کے مستحق ہیں۔ انہوں نے حرمِ امام علیؑ کے عملے کی جانب سے سکیورٹی اہلکاروں کے ساتھ بھرپور تعاون کو بھی سراہا، جس سے زیارت کے دوران زائرین کی آمدورفت میں روانی اور سکیورٹی انتظامات میں بہترین رابطہ کاری ممکن ہوئی

یہ مسلسل دوسرا سال ہے کہ حرمِ امام علیؑ کی جانب سے صوبہ بصرہ کے دوسرے پولیس کالج کے طلبہ کو زیارتِ اربعین امام حسینؑ اور رسولِ اکرم حضرت محمد صلی اللہ علیہ وآلہ وسلم کی شہادت کی مناسبت سے انجام دی جانے والی سکیورٹی خدمات کے اعتراف میں اعزاز سے نوازا گیا ہے