حرمِ امام حسینؑ کے شعبۂ صحت و طبی تعلیم نے صوبہ بصرہ میں زائرینِ اربعین کی خدمت کے لیے ایک جامع میڈیکل کیمپ قائم کیا ہے، جہاں زائرین کو مفت طبی معائنہ، علاج اور ادویات کی سہولیات فراہم کی جا رہی ہیں

یہ میڈیکل کیمپ بصرہ سے کربلائے مقدسہ کی جانب پیدل روانہ ہونے والے زائرین کی خدمت کے لیے ترتیب دیے گئے خصوصی منصوبے کا حصہ ہے

شعبۂ صحت و طبی تعلیم کے مطابق یہ میڈیکل کیمپ مرجعِ دینیِ اعلیٰ کے نمائندے شیخ عبدالمہدی کربلائی کی خصوصی ہدایات اور سرپرستی میں قائم کیا گیا ہے، جس کا مقصد زائرین کے لیے محفوظ طبی ماحول فراہم کرنا اور اربعینِ حسینی کے احیاء میں شریک لاکھوں زائرین کو اعلیٰ معیار کی مفت طبی سہولیات مہیا کرنا ہے

بیان میں مزید کہا گیا کہ کیمپ کے مقام کا انتخاب اور اس کی تیاری ایک جامع فیلڈ اسٹڈی کے بعد عمل میں لائی گئی، تاکہ ہنگامی طبی حالات میں فوری اور مؤثر امداد فراہم کی جا سکے۔ اس مقصد کے لیے کیمپ کو ضروری ادویات، طبی آلات اور دیگر علاجی سامان سے مکمل طور پر آراستہ کیا گیا ہے، جبکہ ماہر ڈاکٹروں، نرسوں اور طبی عملے کو چوبیس گھنٹے بلا تعطل خدمات انجام دینے کے لیے تعینات کیا گیا ہے

واضح رہے کہ یہ میڈیکل کیمپ حرمِ امام حسینؑ کے شعبۂ صحت و طبی تعلیم کی جانب سے اربعینِ حسینی کے موقع پر جاری وسیع انتظامات کا حصہ ہے۔ شعبہ ہر سال مختلف صوبوں اور کربلا جانے والے راستوں پر میڈیکل کیمپ، طبی مراکز اور امدادی ٹیمیں تعینات کرتا ہے تاکہ لاکھوں زائرین کو سفر کے دوران شب و روز بروقت اور معیاری طبی سہولیات فراہم کی جا سکیں