مرجعیتِ دینیہ عالیہ کے نمائندے، سماحۃ الشیخ عبد المہدی کربلائی نے امام زین العابدین ہسپتال کے میڈیکل وارڈ کا افتتاح کیا، جہاں نئے سی ٹی اسکین اور ایم آر آئی مشینیں نصب کی گئی ہیں

افتتاحی تقریب سے خطاب کرتے ہوئے شیخ کربلائی نے طبّی تعلیم میں نظری اور عملی تربیت کے امتزاج کی اہمیت پر زور دیا

انہوں نے کہا کہ میڈیکل کالجز میں تھیوری کے ساتھ ساتھ پریکٹیکل کو یکجا کرنا نہایت ضروری ہے، کیونکہ یہی ہم آہنگی ایک قابل اور ماہر ڈاکٹر کی تیاری کے لیے بنیادی ستون کی حیثیت رکھتی ہے، جو اپنے پیشہ وارانہ سفر کے آغاز ہی سے درست تشخیص کی صلاحیت رکھتا ہو۔

انہوں نے وضاحت کی کہ کلینیکل تربیتی مراحل طلبہ کو اس قابل بناتے ہیں کہ وہ طبی نظریات کو حقیقی مریضوں پر عملی طور پر نافذ کریں، جس سے ان کی مہارتوں میں اضافہ ہوتا ہے اور وہ تشخیص و علاج میں ماہر اور تجربہ کار ڈاکٹر بننے کے قابل ہوتے ہیں

مزید کہا کہ نئی قائم کی گئی وارڈز ایک مکمل طبی ماحول فراہم کرتی ہیں، جہاں مریض کو خصوصی کمرہ فراہم کیا جاتا ہے جس میں تمام ضروری طبی سہولیات دستیاب ہوتی ہیں۔ اس کے ساتھ ساتھ ہسپتال کو جدید ترین طبی آلات سے بھی لیس کیا گیا ہے، جن میں جدید سی ٹی اسکین اور ایم آر آئی مشینیں شامل ہیں، جو اس شعبے میں جدید ٹیکنالوجی کی نمائندگی کرتی ہیں

انہوں نے مزید کہا کہ ان سہولیات کی بدولت اب بیماریوں کی نہایت درست تشخیص ممکن ہو گئی ہے، جس سے ڈاکٹروں کو مریضوں کی بیماریوں کی درست نشاندہی اور مناسب علاج فراہم کرنے میں مدد مل رہی ہے۔ اس کے نتیجے میں مریضوں کو علاج کے لیے بیرونِ ملک جانے کی ضرورت بھی کم ہو گئی ہے، جس سے ان پر نفسیاتی اور مالی بوجھ میں نمایاں کمی آئی ہے